بەهۆی گەرما لە زۆرینەی پارێزگاکانی ناوەڕاست و باشووری عێراق ئەمڕۆ کراوەتە پشوو

ئاڤا نیوز

 

بەهۆی ئەو شەپۆلە گەرمایەی ڕووی لە عێراق کردووە، زۆربەی پارێزگاکانی ناوەڕاست و باشوور ئەمڕۆ یەکشەممەیان کردە پشووی فەرمی. هاوکات، چەند پارێزگایەکی دیکە بڕیاریان دا دەوامی فەرمی کەم بکەنەوە وەک ڕێکارێک بۆ خۆپارێزی لە بەرزبوونەوەی پلەی گەرما.

 

ئەوەی پێشبینی دەکرێت: بەگوێرەی پێشبینییەکانی دەستەی کەشناسیی عێراق، ئەمڕۆ پلەکانی گەرما لە پارێزگاکانی ناوەڕاست و باشووری عێراق گەیشتووەتە نیوە کوڵان. بۆ ئەو مەبەستەش چەندین پارێزگا ڕێکاری خۆپارێزییان گرتووەتەبەر و بڕیاریان داوە ئەمڕۆ بکرێتە پشوو.

 

بڵاوکراوەی فەرمی: بەپێی بەیاننامە فەرمییەکان، هەریەک لە پارێزگاکانی کەربەلا، دیوانیە، واست، بەسرە، زیقار، موسەننا و میسان ئەمڕۆ یەکشەممە، 27ی تەمموز، لە سەرجەم فەرمانگە و دامەزراوەکانیاندا پشووی فەرمییە. هۆکاری بڕیارەکەش بۆ بەرزبوونەوەی پلەکانی گەرما و تێپەڕاندنی ئاستە ئاساییەکان دەگەڕێتەوە.

 

لەلایەکی دیکەوە: چەند پارێزگایەک ڕێکاری جیاوازیان گرتووەتەبەر بە کەم کردنەوەی کاتەکانی دەوام، لەوانە پارێزگای پارێزگای دیالە، پارێزگای سەڵاحەدین و پارێزگای بابل.

 
زانیاریی زیاتر: ئەم ڕێکارانە لەپێناو پاراستنی سەلامەتیی فەرمانبەران و هاوڵاتییان گیراونەتەبەر، بەهۆی ئەو شەپۆلە گەرمایەی کە پێشبینی دەکرێت لە ڕۆژانی داهاتووشدا بەردەوام بێت.

 

ئەوەی پێویستە بیزانیت: پلەکانی گەرما لە هەندێک شوێنی ناوچەکانی خوارووی عێراق بەم شێوەیە:

-فڕۆکەخانەی بەسڕە: 52.2 پلەی سیلیزی.
-شاری حوسێن لە بەسڕە: 50.9 پلەی سیلیزی.
-ناسڕیە: 50.6 پلەی سیلیزی.
-مووسڵ: 50.4 پلەی سیلیزی.