لە بەغدا 700 شوێنی بازرگانی بەهۆی نەبوونی مەرجی سەلامەتی دادەخرێن

ئاڤا نیوز

دوای ڕووداوەکەی کوت ڕێکارەکانی سەلامەتی و بەرگریی شارستانی لە عێراق تووندکراونەتەوە، لەو چوارچێوەیەشدا 700 پرۆژەی بازرگانی و دووکان لە بەغدای پایتەخت داخران.

 

چیرۆکی سەرەکی: شەوی 2025-07-16، لە شاری کوت لە پارێزگای واستی ناوەڕاستی عێراق، ئاگرێکی گەورە لە مۆڵێکی پێنج نهۆمی کەوتەوە، بەهۆی نەبوونی مەرجی تەندروستیی و سەلامەتی، زیاتر لە 60 کەس گیانیان لەدەست دا و دەیان کەسی دیکەش برینداربوون، لەسەر ئەم ڕووداوەش سوودانی سێ بڕیاری دەرکرد، یەکێک لەوانیش جێبەجێکردنی ڕێکارەکانی سەلامەتیی بەرگریی شارستانی بوو لە سەرانسەری وڵاتدا.

 

لێدوانی فەرمی: حوسێن ئیبراهیم، بەڕێوەبەری بەرگریی شارستانی بەغدا بە ئاژانسی هەواڵی فەرمیی عێراقی ڕاگەیاندووە، هەزار و 300 پرۆژەی بازرگانی و دووکان لە بەغدا تۆمارکراون کە مەرجەکانی سەلامەتییان تێدانەبووە، بۆیەش 15 ڕۆژ مۆڵەتیان پێدراوە تا مەرجەکانی بەرگریی شارستانی جێبەجێ بکەن.

 

ئاماژەی بەوەش داوە، بڕیاری داخستنی شوێنەکان تەنیا بە بڕیاری پارێزگار دەبێت، بۆیەش لەسەر بڕیاری پارێزگاری بەغدا 700 شوێن لە پڕۆژەی بازرگانی و دووکان داخراون، بەهۆی ئەوەی ڕێکارەکانی بەرگریی شارستانی و سەلامەتییان جێبەجێنەکردووە.

 

لەلایەکی دیکەوە: نووسینگەی سەرۆکوەزیرانی عێراق بڵاوی کردەوە، بەمەبەستی جێبەجێکردنی ڕێکارەکانی پاراستنی گشتی و بەرگریی شارستانی، محەممەد شیاع سوودانی، سەرۆکوەزیران کۆبوونەوەیەکی بەپەلەی لەگەڵ پارێزگارەکان و وەزیرە پەیوەندیدارەکان ئەنجامداوە.