ئەمریکا و ئەوروپا ڕێککەوتنی بازرگانی ڕادەگەیێنن

ئاڤا نیوز

سەرۆکی ئەمریکا، ڕایگەیاند کە لەگەڵ ئۆرسۆلا ڤۆن دێر لاین، سەرۆکی کۆمیسیۆنی یەکێتی ئەوروپا گەیشتوونەتە ڕێککەوتنێکی بازرگانی.

لێدوانی فەرمی: دۆناڵد ترەمپ، سەرۆکی ئەمریکا دوای گفتوگۆکانیان لەگەڵ ڤۆن دێر لاین لە سکۆتلەندا بە ڕۆژنامەنووسانی وت، "گەیشتووینەتە ڕێککەوتنێک، ئەمە ڕێککەوتنێکی باشە بۆ هەمووان و ئەوروپا بە بەهای 750 ملیار دۆلار وزە لە ئەمریکا دەکڕێت و بە بەهای 600 ملیار دۆلار وەبەرهێنان لە ئەمریکادا دەکەن" ڤۆن دێر لاینیش بە هەمان شێوە ستایشی ڕێککەوتنەکەی کرد و بە "ڕێککەوتنێکی باش" ناوی برد.

سەرۆکی ئەمریکا جەختی لەوە کردەوە، پێویستە یەکێتی ئەوروپا سنوورەکانی بەڕووی بەرهەمە ئەمریکییەکان بکاتەوە، و ڤۆن دێر لاینیش جەختی لەوەکرەوە کە هەر ڕێککەوتنێکیان لەگەڵ ئەمریکا دەبێت لەسەر بنەمای دادپەروەری و هاوسەنگ بێت.

زانیاریی زیاتر: پەیوەندییە بازرگانییەکانی نێوان ئەمریکا و یەکێتی ئەوروپا یەکێکن لە گەورەترین پەیوەندییە بازرگانییەکانی جیهانن، هەردوولا گەورەترین هاوبەشی بازرگانی و وەبەرهێنانی یەکترین.

ئەوەی پێویستە بیزانیت: کۆی گشتی بازرگانی کاڵا لە نێوان یەکێتی ئەوروپا و ئەمریکادا لە ساڵی 2024 بە نزیکەی 976 ملیار دۆلار مەزەندە کراوە. دوو هێزە ئابوورییەکە پێکەوە نزیکەی یەک لەسەر سێی بازرگانی جیهانی کاڵا و خزمەتگوزاری پێکدەهێنن.

ئەمەش بزانە: ساڵی ڕابردوو، ئەمریکا بە بەهای نزیکەی 606 ملیار دۆلار کاڵای لە یەکێتی ئەوروپا هاوردە کردووە و بە بەهای نزیکەی 370 ملیار دۆلاریش کاڵای هەناردە کردووە. ئەم ناهەوسەنگییە، یان کورتهێنانی بازرگانییە، خاڵێکی جێی نیگەرانی دۆناڵد ترەمپە کە دەڵێت، پەیوەندییە بازرگانییەکانی لەم شێوەیەدا بە واتای دۆڕانی ئەمریکایە.