عەزم سەرکەوتنی کاندیدەکەی بۆ پۆستی سەرۆکی پەرلەمان ڕادەگەیێنیت

ئاڤا نیوز

هەرچەندە یەکەمین کۆبوونەوەی خولی نوێی پەرلەمان کەمتر لە دوو ڕۆژی ماوە، بەڵام سەرکردەیەکی هاوپەیمانی عەزم دەڵێت، موسەننا سامەڕائی سەرۆکی هاوپەیمانێتییەکەیان دەبێتە سەرۆکی پەرلەمان و هەڵبژاردنی سەرۆکی پەرلەمان دەباتەوە.

بۆچی گرنگە: لەناو سوننەکاندا تەنیا موسەننا سامەڕائی، سەرۆکی هاوپەیمانیی عەزم و محەممەد حەلبووسی سەرۆکی حیزبی تەقەدووم کورسی پێویستیان بۆ کێبڕکێی پۆستی سەرۆکی پەرلەمان هەیە، سامەڕائی لەناو شیعەکان و کورد و زۆرینەی لایەنە سوننیەکاندا ڕەزامەندییەکی زیاتری لەسەرە و وەک بەهێزترین کاندید بۆ پۆستی سەرۆکی پەرلەمانی عێراق ناوی دەهێنرێت.

بڵاوکراوەی فەرمی: مەحموود قەیسی، سەرکردە لە هاوپەیمانی عەزم و کاندیدی دەرچووی هاوپەیمانێتییەکە، لە هەژماری خۆی لە تۆڕی ئێکس نووسیویەتی، ئێستا وڵات پێویستی بە سەرکردەیەک هەیە کە بە ڕوانگەی بەرژەوەندی گشتی کاربکات نەک پەرچەکردار، بۆ پاراستنی ئارامی و یەکڕیزی نیشتیمانیش هەڵوێستێکی ڕوونی هەبێت.

ئەوەشی خستووەتەڕوو، ئەمڕۆ چەکوشی دەستی سەرۆکی پەرلەمان بەدەست سەرۆکی هاوپەیمانی عەزمەوەیە، ئەوەش بەرکەوتەیەکە لەسەر بنەمای پێوەری بابەتی و ڕوانگەی بەرپرسیارانە، بەجۆرێک ئەم قۆناغە پێویستی بە کەسێکە بۆ سەرۆکی پەرلەمان کە بەداناییەوە مامەڵە بکات.

زانیاریی زیاتر: مەحموود قەیسی لەگەڵ پۆستەکەیدا، هاشتاگی "سامەڕائی سەرۆکە"شـی داناوە.