زانیاری نوێ لەبارەی مووچەی خانەنشینانی نوێ و دوو ئیکرامییەکە

ئاڤا نیوز

بەڕێوەبەرایەتیی گشتیی خانەنشینی بەردەوامە لە تەواوكردنی مامەڵەی ئەو فەرمانبەرانەی كە وادەی خانەنشینبوونیان هاتووە، ئاڤا زانیویەتی بۆ مانگی حەوت زیاتر لە سێ هەزار خانەنشین مووچە حەوت مانگ بەیەکەوە وەردەگرن. 

چیرۆکی سەرەکی: مانگانە چەند هەزار فەرمانبەرێك مامەڵەكانی خانەنشینیان تەواو دەبێت و چەند مووچەیەک بەیەكەوە وەردەگرن بۆ مانگی حەوتیش مووچەی خانەنشینی زیاتر لە سێ هەزار و 600 مووچەخۆر دەگەڕێتەوە و حەوت مووچە بەیەكەوە وەردەگرن، واتا لە مانگی یەكی ئەمساڵەوە تاوەكوو مانگی حەوت، مووچەی هەر حەوت مانگەكە وەردەگرن.

زانیاریی تایبەت: بەڕێوەبەرایەتیی گشتیی خانەنشینی بە ئاڤای ڕاگەیاند: ئێستا دۆسیەی 400  خانەنشین ماوە تەواوبکرین،  ئەوانیش لەم هەفتەیە فایلەکانیان تەواو دەبێت و بۆ مانگی هەشتی ئەمساڵ مووجە وەردەگرن.

لێدوانی فەرمی: سەبارەت بە ئەو فەرمانبەرانەی كە ئیكرامییەی شەش مانگ یاخود 12 مانگ بەیەكەوە وەردەگرن، لە بەڕێوەبەرایەتیی گشتیی خانەنشینی بە ئاڤایان ڕاگەیاندووە، وەزارەتی دارایی كوردستان نووسراوی بۆ وەزارەتی دارایی عێراق كردووە و چاوەڕوانی دابینكردنی پارەكەین.

لە كۆی 22 هەزار و 500 خانەنشین، زیاتر لە پێنج هەزار خانەنشین 12 مووچەكە دەیانگرێتەوە دەبێت بەغدا بیدات.

نزیكەی 17 هەزاریشیان شەش مووچەكە دەیانگرێتەوە کە حکومەتی کوردستان خۆی دەبێت خەرجی بکات، زیاتر لە شەش هەزاریان لە سنووری سلێمانی وەریانگرتووە، ئەوانی تریش تەخسیسی پارەیان بۆ كراوە و تەنیا خەرجكردنەكەی ماوە، كەمێك كاتی دەوێت تا خەرج دەكرێت.

باکگراوند: لەو 22 هەزار و 100 خانەنشینەی مامەڵەیان تەواو بووە، تا ئێستا زیاتر لە 10 هەزاریان مووچەیان بۆ بەستراوە، لەگەڵ مووچەی مانگی شەش، هەشت هەزار و 938 خانەنشینی دیکە مووچەیان بۆ دەبەسترێت و شەش مووچە بەیەکەوە وەردەگرن.