سعوودیە: زۆرینەی وڵاتان ئارەزووی دانپێدانانیان بە دەوڵەتی فەڵەستین هەیە

ئاڤا نیوز

وەزیری دەرەوەی سعوودیە، داوای ڕاگرتنی دەستبەجێی شەڕی غەززە دەکات و دەڵیت، زۆرینەی وڵاتان ئارەزووی دانپێدانانیان بە دەوڵەتی فەڵەستین هەیە.

چیرۆکی سەرەکی: لە پەراوێزی کۆنفرانسی "چارەسەری دوو دەوڵەتی" کە سعوودیە و فەرەنسا لە نیویۆرک بە هاوبەشی سەرۆکایەتیی کۆنفرانسەکە دەکەن. وەزیری دەرەوەی سعوودیە لە کۆنگرەیەکی ڕۆژنامەوانیی هاوبەشدا لەگەڵ هاوتا فەرەنسییەکەیدا پێشوازییان لە نووسراوەکەی ئیمانوێل ماکرۆن، سەرۆکی فەرەنسا کرد، سەبارەت بە نیازى وڵاتەکەی بۆ دانپێدانان بە دەوڵەتی فەڵەستین و بە "هەنگاوێکی مێژوویی" وەسفی کرد.

لێدوانی فەرمی: فەیسەڵ بن فەرحان، وەزیری دەرەوەی سعوودیە ڕایگەیاند،  کاتی ئەوە هاتووە کۆتایی بە ململانێی فەڵەستینی-ئیسرائیلی بهێنرێت و دەوڵەتی فەڵەستین بەرجەستە بکرێت، هەروەها ئاشتییەک بچەسپێنرێت کە سەروەری و ئاسایشی گەلانی ناوچەکە بپارێزێت.

شازادە فەیسەڵ ئاماژەی بەوەشدا، گفتوگۆیان لەگەڵ ژمارەیەک وڵاتی ئەوروپی و ئاسیایی کردووە بۆ هاندانیان تا دان بە دەوڵەتی فەڵەستیندا بنێن، ڕوونیشی کردەوە کە زۆرینەی وڵاتان ئارەزووی دانپێدانانیان بە دەوڵەتی فەڵەستین هەیە.

لەلایەکی دیکەوە: جان نۆیل بارۆ، وەزیری دەرەوەی فەرەنسا ڕایگەیاند، گەلی فەڵەستین مافێکی ڕەوایان هەیە خاوەنی دەوڵەتی خۆیان بن و ئەمەش لەگەڵ ئاسایشی ئیسرائیلدا یەکدەگرێتەوە.