پۆلیسی سەیدسادق تۆمەتبارێکی ڕووداوی کوشتن و ماتۆڕسوارێکی جانتا ڕفێنی دەستگیر کرد

ئاڤا نیوز

پۆلیسی سەیدسادق، ئەمڕۆ دوو تۆمەتباری دەستگیرکردووە، یەکێکیان گەنجێکە باوکی خۆی کوشتووە، ئەوەی تریان بە ماتۆڕسکیلێکەوە جانتای لە شانی ئافرەتێک ڕفاند بوو.

لێدوانی فەرمی: سەرکەوت ئەحمەد، وتەبێژی پۆلیسی سلێمانی بە ئاڤا میدیای وت، ئەو تۆمەتبارەی پێنج ڕۆژ لەمەوبەر لە سەیدسادق کەسێکی کوشت دەستگیرکرا، دەرکەوت تۆمەتبار کوڕی کوژراوەکەیە و تەمەنی 24 ساڵە. هۆکاری ڕووداوەکە بەیەکەوە نەگونجانییان بووە.

لەلایەکی دیکەوە: ئەمڕۆ سێشەممە، پۆلیسی سەیدسادق گەنجێکی تەمەن 25 ساڵەیان دەستگیرکرد. چەند ڕۆژێک لەمەوبەر بە سواری ماتۆڕەوە جانتای لە شانی ژنێک ڕفاندبوو. وتەبێژی پۆلیسی سلێمانی دەڵێت: ئەو گەنجە خەڵکی سنوورەکەیە، ویستویەتی پارەی دەستکەوێ، جانتاکە بڕێک پارەی تیا بووە.

بەوتەی سەرکەوت ئەحمەد، ماوەیەک بوو ڕووداوی لەم شێوەیە کۆتایی هاتبوو، بەڵام ئێستا ئەم ڕووداوانە تازە سەریانهەڵداوەتەوە. هۆکاری سەرەکی زۆری ژمارەی ماتۆڕە بەدەستی گەنجانەوە.