دۆسیەی خانەنشینی سێ تەمەنەکە تەواو دەبێت

ئاڤا نیوز

سبەی دۆسیەی خانەنشینانی سێ تەمەنە جیاوازەکە تەواو دەبێت کە ژمارەیان نزیکەی 23 هەزار کەسە و نزیکەی 13 هەزاریان شەش مووچە، حەوت مووچە و هەشت مووچە بەیەکەوە وەردەگرن.

وێنە گەورەکە: لە سەرەتای ئەمساڵەوە دۆسیەی 22 هەزار و 500 کەس تەواو کراوە، تەنیا مامەڵەی 400 خانەنشین مابوون، ئەوانیش تەواوکراون و لە لیستی مووچەی مانگی هەشت تۆماردەکرێن و هەشت مووچە بەیەکەوە وەردەگرن. 

ژمارەکان وادەڵێن: لە مانگەکانی ڕابردوودا نۆ هەزار و 562 کەس مووچەیان بۆ بەستراوە. هێشتا  12 هەزار و 938 کەس ماون، لەگەڵ مووچەی مانگەکانی شەش و حەوت و هەشت مووچە وەردەگرن.

مانگی شەش: هەشت هەزار و 938 خانەنشین شەش مووچە بەیەکەوە وەردەگرن.

مانگی حەوت: سێ هەزار و 600 خانەنشین حەوت مووچە وەردەگرن.

مانگی هەشت: 400 خانەنشین هەشت مووچە بەیەکەوە وەردەگرن.

زانیاریی زیاتر: لە كۆی ئەو 22 هەزار و 500 خانەنشینە، زیاتر لە پێنج هەزاریان 12 مووچەكەی ئیکرامییە دەیانگرێتەوە، نووسراو بۆ بەغدا نێردراوە و تاوەکو ئێستا دیارنییە کەی خەرج دەکرێت.

نزیكەی 17 هەزاریشیان شەش مووچەكە دەیانگرێتەوە و حکومەتی هەرێمی کوردستان خۆی خەرجی دەکات، زیاتر لە شەش هەزاریان لە سنووری سلێمانی وەریانگرتووە و پرۆسەکە بەردەوامە، لە هەولێر و دهۆکیش بەمزووانە دەستپێدەکات.

زانیاریی تایبەت: سەرچاوەیەک لە بەڕێوەبەرایەتی گشتیی خانەنشینی هەرێمی کوردستان بە ئاڤای گوت، لە سبەی پێنجشەممەوە دەست بە دۆسیەی خانەنشینانی لەدایکبووی ساڵی 1965دەکرێت.

ئەوەی پێویستە بیزانیت: مەبەست لە سێ تەمەنەکە، ئەو کەسانە دەگرێتەوە کە سەرەتای ئەمساڵ بەهۆی هاوتاکردنی تەمەنی خانەنیشینی لەگەڵ عێراق لە 63 ساڵەوە کەمکرایەوە بۆ 60 ساڵ، لەدایکبووانی 1962-1963-1964 بەیەکەوە خانەنشین بوون.