قوربانییەکی زیندووی هەڵەبجە، 36 ساڵە چاوەڕێی چارەسەرە و بەرپرسان بێدەنگن

ئاڤا نیوز

یەکێک لە قوربانیانی زیندووی کارەساتی کیمیابارانی هەڵەبجە، پاش 36 ساڵ ژیان بە ئازاری سەختەوە، هێشتا چاوەڕێی بەڵێنی بەرپرسانە بۆ ناردنە دەرەوەی وڵات و وەرگرتنی چارەسەری پزیشکی، لە کاتێکدا دۆخی تەندروستی ڕۆژ بە ڕۆژ بەرەو خراپتر دەچێت و بەڕێوەبەری نەخۆشخانەی بەرکەوتووانیش دۆخەکەی بە "یەکێک لە خراپترینەکان" ناودەبات.

چیرۆکی سەرەکی: لە ساڵی 1988، کاتێک بۆمبە کیمیاییەکان بەسەر هەڵەبجەدا بارین، بۆمبێک بەر ماڵی جەمال حوسێن حەمەساڵح، دەکەوێت. لەم ڕووداوە، جەمال دایک و باوکی لەدەستدەدات و خوشکێکیشی تا ئەمڕۆ چارەنووسی نادیارە. خۆشی بەهۆی بەرکەوتنی پارچەی بۆمبەکەوە بە سەختی بریندار دەبێت و لەو کاتەوە تا ئێستا، بۆ ماوەی 36 ساڵە، لەسەر جێگە ماوەتەوە.

کاریگەریی و لێکەوتەکان: برینەکەی جەمال کاریگەریی ڕاستەوخۆی لەسەر بڕبڕەی پشتی و حەبلی شەوکی داناوە، کە بووەتە هۆی لەکارکەوتنی قاچێکی. سەرەڕای ئەنجامدانی چوار نەشتەرگەری و بڕینی مەتر و نیوێک لە ڕیخۆڵەی، دۆخی تەندروستیی ناجێگیرە و ئێستا کۆنترۆڵی میز و پیسایی لەدەستداوە.

هەرچەندە پێشتر لە تورکیا نەشتەرگەرییەکی بۆ گەورەکردنی میزەڵدانی بۆ کراوە، بەڵام بەپێی ڕاپۆرتە پزیشکییەکان، پێویستی بە نەشتەرگەرییەکی دیکەی پێشکەوتوو هەیە لە دەرەوەی وڵات بۆ ئەوەی بتوانێت کۆنترۆڵی جەستەی بەدەست بهێنێتەوە.

لێدوانی فەرمی: ئومێد حوسێن برای جەمال، بە ئاڤای وت، "زۆر هەوڵمانداوە، سەردانی وەزیری تەندروستیمان کردووە و ئەویش ئێمەی ئاراستەی پزیشکی ڕاوێژکاری خۆی کردووە، ئەوانیش جەختیان لەوە کردووەتەوە کە پێویستە جەمال بۆ چارەسەر بنێردرێتە دەرەوەی وڵات."

ئومێد دەشڵێت: "نووسراوی پزیشکی و داواکاریمان داوەتە دەست وەزیری شەهیدان و ئەنفالکراوان، بەڵام بەداخەوە تا ئێستا هیچ وەڵام و ئەنجامێکمان دەستنەکەوتووە."

لەلایەکی دیکەوە: عیماد فەیروز، بەڕێوەبەری نەخۆشخانەی بەرکەوتووانی چەکی کیمیایی بە ئاڤای وت، "ئێمە ئەوەی لە تواناماندا بێت وەک چاودێری و خزمەت بۆ بەرکەوتووان دەیکەین، بەڵام لە ئێستادا 64 بەرکەوتوومان هەیە کە پێویستیان بە چارەسەرە لە دەرەوەی وڵات. کاک جەمال یەکێکە لە خراپترین کەیسەکان و زۆر پێویستە کە بۆ چارەسەر بنێردرێتە دەرەوە."

بنەماڵەی جەمال لەڕێگەی ئاڤا میدیاوە داوا لە لایەنە پەیوەندیدارەکانی حکومەتی هەرێمی کوردستان و ڕێکخراوە مرۆییەکان دەکەن کە بە هانایانەوە بچن و هاوکاربن لە ناردنی جەمال بۆ وەرگرتنی چارەسەر، تا کۆتایی بەو ئازارە 36 ساڵییەی بهێنرێت.