ئاگرەکەی پێنجوێن هەزاران دۆنم پوش و پاوانی سوتاندووە

ئاڤا نیوز

 

ئاگرێکی گەورە لە سنووری گوندەکانی ناحییەی گەرمک لە سنووری قەزای پێنجوێن کەوتەوە، دوای ئەوەی هەزاران دۆنم پوش و پاوان دەسووتان، توانرا کۆنترۆڵ بکرێت.

 

چیرۆکی سەرەکی: ڕۆژی سێشەممە 29ـی 7ـی 2025، ماوەی دوو ڕۆژە ئاگرێکی گەورە ڕووبەرێکی فراوانی لە سنووری گوندەکانی وێنە، شێخە، تەیمەز، شێوە گوێزان گرتووەتەوە، بەو هۆیەوە زیانێکی گەورەی بە سنوورەکە گەیاندووە.

 

بڵاوکراوەی فەرمی: بەڕێوەبەرایەتیی پۆلیسی دارستان و ژینگەی پارێزگای سلێمانی ڕاگەیاند: سەرچاوەی ئەو ئاگرە لە ڕۆژهەڵاتی کوردستانەوە بووە و  بەرەو سنووری گەرمک تەشەنەی کردبوو، بەڵام توانرا کۆنترۆڵ بکرێت.

 

زانیاریی زیاتر: بەهۆی سەختی ناوچەکە و هەبوونی پاشماوەی مین و تەقەمەنی، کوژاندنەوەی ئاگرەکە بۆ تیمەکانی بنکەی دارستان و ژینگەی گەرمک و گوندنشینان و ئەندامانی خۆبەخشی ڕێکخراوی ملەکەوە دژوار بووە.

 

زیانەکان: بەهۆی ئاگرەکەوە هەزاران دۆنم پوش و پاوان و دارستانی سرووشتی سووتاون و زیان بە سرووشت و ژینگەی ناوچەکەش گەیشت.

 

ئەمەش بزانە: ناحییەی گەرمک سەر بە قەزای پێنجوێنە لە سنووری پارێزگای سلێمانی، هاوسنوورە لەگەڵ ڕۆژهەڵاتی کوردستان.