لیژنەیەکی بەدواداچوون بۆ بۆنە ناخۆشەکەی کەرکووک پێکدەهێنرێت

ئاڤا نیوز


وەکو وەڵامدانەوەیەک بۆ سکاڵای هاووڵاتییان و لەپێناو پاراستنی تەندروستیی گشتی و ژینگە، پارێزگاری کەرکووک، فەرمانێکی کارگێڕی بۆ پێکهێنانی لیژنەیەکی باڵا دەرکرد، بەمەبەستی بەدواداچوون و دیاریکردنی سەرچاوەی ئەو بۆنە ناخۆشەی کە لە ژمارەیەک گەڕەکی شارەکە بڵاوبووەتەوە. 

چیرۆکی سەرەکی: لەماوەی چەند ڕۆژی ڕابردوودا، لە چەند گەڕەکی ڕۆژهەڵاتی کەرکووک بۆنێکی ناخۆش و زیانبەخش بڵاوبووەتەوە کە هاووڵاتییانەی ئەو ناوچانەی ناچارکردووە سكاڵا بکەن، لە ئەنجامدا بە فەرمانی پارێزگار لیژنەیەک بۆ لێکۆڵینەوە پێکهێنرا.

نوسراوی فەرمی: بەگوێرەی نووسراوێکی فەرمی کە واژۆی ڕێبوار تەها، پارێزگاری کەرکوک لەسەرە، لیژنەیەک بۆ بەدواداچوونی سکاڵای هاووڵاتیان سەبارەت بە بڵاوبوونەوەی بۆنی ناخۆش لە گەڕەکەکانی (حوڕییە، ڕزگاری، و پەنجا عەلی) پێکهێنرا.

زانیاریی زیاتر: بەپێی فەرمانەکە، ئەرکی سەرەکیی لیژنەکە بریتییە لە ئەنجامدانی پشکنینی مەیدانی بۆ ئەو ناوچانە بەمەبەستی دیاریکردنی سەرچاوەی بۆنە پیسکەرەکان، بەتایبەتی کارگەکانی قیلسازی و وێستگەی "بوور"ی سەر بە کۆمپانیای نەوتی باکوور.

سوود وەرگرتن لە ئامێر و کەرەستەی تەکنیکیی کۆمپانیاکانی نەوتی باکوور، گازی باکوور و بەڕێوەبەرایەتیی ژینگە بۆ ئەنجامدانی پشکنینی پێویست.

پێشکەشکردنی ڕاپۆرتێکی ورد لەگەڵ ڕاسپاردە و پێشنیازەکان لە ماوەی (15) ڕۆژدا لە ڕێککەوتی دەرچوونی فەرمانەکەوە، تاوەکو ڕێکاری یاسایی و بنەڕەتی بگیرێتەبەر.