ڕێژەی سەوزایی هەولێر 20% تێدەپەڕێنێت

ئاڤا نیوز

بە هەوڵی دامودەزگاكانی حكومەت و هاووڵاتیان لە ماوەی 20 ساڵدا ڕێژەی سەوزایی لە شاری هەولێر نزیك دەبێتەوە لە ستانداردی جیهان و ئێستا %20ی تێپەڕاندووە.

وێنە گەورەكە: لە هەرێمی كوردستان فەرمانگە و دەزگای فەرمیی هەن كە ئەركی سەوزكردنی شارەكان و بەرزكردنەوەی ڕێژەی سەوزاییان لە ئەستۆیە ئەوانیش، شارەوانی و ژینگە و ئەندازەی پاركەكانن، ئەمە سەرەڕای بەرزیی ئاستی هۆشیاریی هاووڵاتیان سەبارەت بە گرنگیی سەوزایی و پاكڕاگرتنی ژینگە بۆ بەردەوامیی ژیان و تەندروستییەكی باش، ئێستا هەولێر كە پایتەختی هەرێمی كوردستان نزیك دەبێت لەو ڕێژە سەوزاییەی كە بەپێی ستانداردی جیهانی دەبێت شارە گەورەكان هەیانبێت.

لێدوانی فەرمی: ڕێبین ئەحمەد، بەڕێوەبەری ئەندازەی پاركەكانی هەولێر بە ئاڤا میدیای ڕاگەیاند: هەرچەندە ژینگەی هەولێر بەراورد بە چەند ساڵی ڕابردوو پیستر بووە، بەڵام لە ڕووی ڕێژەی سەوزاییەوە زۆر زیاتر بووە، 20 ساڵ پێش ئێستا ڕێژەكە 3% بوو، بەڵام ئێستا بووەتە 20%، تەنیا لە ماوەی پێنج ساڵی كابینەی نۆ 2.5% ڕێژەكە زیادی كردووە، ئەمەش هێمایە بۆ ئەوەی كە  لە ماوەی ئەو پێنج ساڵەدا چ هەوڵێك هەبووە بۆ بەرزكردنەوەی ڕێژەی سەوزایی و پاككڕاگرتنی ژینگە.

زانیاریی زیاتر: بەپێی ستانداردی جیهانیی پێویستە شارە گەورەكان ڕێژەی سەوزییان نزیكەی %30 بێت، ئێستا كە لە هەولێر ڕێژەی %20 تێپەڕیوە، پڕۆژەیەكی گرنگیش هەیە بۆ بەرزكردنەوەی بەرچاوی ڕێژەكە ئەویش پشتێنەی سەوزاییە.

لەلایەكی دیكەوە: لێدوانی فەرمی: هێمن سەید موراد، بەڕێوەبەری کشتوکاڵی هەولێر بە ئاڤای ڕاگەیاند: پشتێنەی سەوزایی هەولێر بەشێوەی بازنەیی بە چواردەوری هەولێر دەسوڕێتەوە و دەکەوێتە دوای شەقامی 150 مەتری، پانیی پشتێنەکە دوو کیلۆمەترە و لەگەڵ پشتێنەکە زیاتر لە 10  پۆند دروست دەکرێن، پشینیازکراوە ملیۆنان داری زەیتون و فستق بچێنرێن، چونکە ئاویان کەم دەوێت و بەرهەمەکانیان داهاتی زۆرە و ئەمە بە یەکەم هەنگاوی جێبەجێکردنی ماستەرپلانی هەولێر دادەنرێت.