دوو ڕۆژە نەتوانراوە ئاگری زبڵخانەکەی سۆران کۆنترۆڵ بکرێت

ئاڤا نیوز

 

وتەبێژی بەرگریی شارستانیی سۆران دەڵێت، پاش دوو ڕۆژ لە هەوڵی بەردەوامی 10 تیم، هێشتا ئاگری زبڵخانەی سۆران کۆنترۆڵ نەکراوە. ناوبراو هۆکارەکەشی بۆ سەختی و دژواریی شوێنی ئاگرەکە گەڕاندەوە.

 

چیرۆکی سەرەکی: ڕۆژی هەینی، 1ی ئابی 2025، ئاگرێکی گەورە لە زبڵخانەی سەرەکیی سۆران لە نزیک گوندی باپشتیان کەوتەوە و تا ئێستا هەوڵەکانی تیمەکانی بەرگریی شارستانی بۆ کۆنترۆڵکردنی ئاگرەکە بێ ئەنجام بوون. ئاگرەکە بووەتە هۆی بڵاوبوونەوەی دوکەڵێکی چڕ و بۆنێکی ناخۆش کە ئاسمانی سۆران و قەزاکانی ڕواندز و خەلیفانی داپۆشیوە، ئەمەش نیگەرانیی لەبارەی کاریگەرییە ژینگەیی و تەندروستییەکانییەوە دروستکردووە.

لێدوانی فەرمی: ڕەوەند هاودیانی، وتەبێژی بەرگریی شارستانیی سۆران، بە ئاڤای ڕایگەیاند: "دوێنێ بە هۆکارێکی نادیار بەشێک لە زبڵخانەی گەورەی سۆران ئاگری گرتووە و تاکو ئێستا کۆنترۆڵ نەکراوە."

 

ڕەوەند هاودیانی دەشڵێت، لە سەرەتای ڕووداوەکەوە 10 تیمی بەرگریی شارستانی بە بەردەوامی کاردەکەن بۆ کوژاندنەوەی ئاگرەکە، بەڵام بەهۆی سەختی و فراوانیی شوێنەکەوە، تا ئێستا سەرکوتوو نەبوون لە کوژاندنەوەی ئاگرەکە.

کاریگەریی و لێکەوتەکان: زبڵخانەی باپشتیان دەکەوێتە بەرامبەر قەزای ڕواندز، ڕۆژانە نزیکەی 300 تۆن زبڵ و خاشاکی ئیدارەی سەربەخۆی سۆرانی تێدا کۆدەکرێتەوە. ئاگرکەوتنەوە لەم زبڵخانەیە، جگە لە زیانی ژینگەیی، مەترسیی جددی بۆ سەر تەندروستیی دانیشتووانی ناوچەکە دروستکردووە، بەتایبەت ئەو کەسانەی کە نەخۆشیی هەناسەدانیان هەیە. دوکەڵ و بۆنی ناخۆش بڵاوبووەتەوە و بووەتە جێی نیگەرانیی هاوڵاتییان لە سۆران، ڕواندز و خەلیفان.