تەرازووی پێداچوونەوەی مانگی حەوت ئامادە دەکرێت

ئاڤا نیوز

وەزارەتی دارایی و ئابووری هەرێمی کوردستان دوای ڕادەستکردنی لیستی مووچەی مانگی حەوتی مووچەخۆران، ئێستا کار لەسەر ئامادەکردنی تەرازووی پێداچوونەوە (میزان موراجەعە) دەکات، بۆ ئەوەی لە چەند ڕۆژی داهاتوو ڕادەست بکرێت.

وێنە گەورەکە: وەزارەتی دارایی عێراق وردبینی لە لیستی مووچە و تەرازووی پێداچوونەوەی مانگی شەش تەواوکردووە و هیچ تێبینییەکی لەسەر نەبووە، ئەمڕۆ لیستی مووچەی مانگی حەوت ڕادەستکرا و کار لەسەر ئامادەکردنی تەرازووی پێداچوونەوەی ئەو مانگەش دەکرێت.

لێدوانی فەرمی: سەرچاوەیەک لە وەزارەتی دارایی و ئابووری هەرێمی کوردستان بە ئاڤای گوت، "کار لەسەر ئامادەکردنی تەرازووی پێداچوونەوەی مانگی حەوت دەکرێت، بۆ ئەوەی پێش 15ـی مانگ تەواوبێت و ڕادەستی وەزارەتی دارایی عێراق بکرێت."

ئەوەی پێویستە بیزانیت: تەرازووی پێداچوونەوە، ڕاپۆرتێکی ژمێریارییە کە یەکەی داهات و خەرجکردن ئەژمارێک لە تۆمارێکی گشتیدا لەخۆ دەگرێت. ئەم ڕاپۆرتە پشتڕاستی دەکاتەوە کە کۆی هەژماری دامەزراوەکە یەکسان و هاوسەنگە بە کۆی خەرجییەکانی هەمان دامەزراوە.