ئەردۆغان دەچێتە ئەمریکا

ئاڤا نیوز

ڕەجەب تەیب ئەردۆغان، سەرۆککۆماری تورکیا 14-5ی ئەمساڵ دەچێتە ئەمریکا و بۆ یەکەمجار لە کۆشکی سپی لەگەڵ جۆ بایدن کۆدەبێتەوە.

بۆچی گرنگە: سەردانەکەی ئەردۆغان لەکاتێکدایە تورکیا پلانی ئۆپەراسیۆنێکی فراوانی دژی پەکەکە لە خاکی هەرێمی کوردستان و عێراقدا  هەیە، مانگێک پێشتریش سەردانی عێراق دەکات.
 
بابەتی ستراتیژی: ئەردۆغان لەگەڵ جۆ بایدنی سەرۆکی ئەمریکا پرسی "ڕووبەڕووبونەوەی تیرۆر"، شەڕی غەززە، چەند بابەتێکی دیکەی گرنگ لە پڕۆژەکانی بەرگرییەوە تا پەیوەندییە ئابوورییەکان تاوتوێ دەکەن.

لەلایەکی دیکەوە: سەرۆکی تورکیا نیگەرانییەکانی وڵاتەکەی لە پاڵپشتیکردنی ئەمریکا بۆ ڕۆژئاوای کوردستان و شەڕڤانانی "هەسەد و یەپەگە" بە بایدن دەگەیێنێت.

ئەوەی پێویستە بیزانیت:  ئەم سەردانەی ئەردۆغان دوای سەردانەکەی هاکان فیدان، وەزیری دەرەوەی تورکیا بۆ ئەمریکا دێت، ئەمە یەکەمجارە ئەردۆغان لە کۆشکی سپی چاوی بە جۆ بایدن بکەوێت.

باکگراوند: پێشتر ئەردۆغان و بایدن لە لووتکە نێودەوڵەتییەکاندا کۆبوونەوەیان کردووە، دواجاریش لە مانگی تەمموزی ڕابردوو بوو لە لووتکەی ناتۆ لە لیتوانیا یەکیان بینی.