لەكابینەی نۆیەمدا هەشت بەنداو و 23 پۆند دروستكراون و 58 پۆندی دیكەش لە دروستكردندان

ئاڤا نیوز

لە ماوەی دەستبەكاربوونی كابینەی نۆیەمی حكومەتی هەرێمی كوردستان، هەشت بەنداو و 23 پۆند بۆ گلدانەوەی ئاو دروستكراون، 58 پۆندی دیكەش لەژێر جێبەجێكردن دان.

وێنە گەورەكە: گرنگیدان بە ئاسایشی ئاو و ڕووبەڕووبوونەوەی وشكەساڵی، یەکێکە لە کارە گرنگ و ستراتیژییەكانی کابینەی نۆیەمی حکومەتی هەرێمی کوردستان، بۆ ئەو مەبەستەش چەندین بەنداو و پۆندی نوێ و پڕۆژەی ئاوی پاك دروستکراون و پرۆسەكەش بەردەوامی هەیە.

لێدوانی فەرمی: ڕەحمان خانی، بەڕێوەبەری گشتیی بەنداوەكانی هەرێمی كوردستان، تایبەت بە ئاڤا ڕایگەیاند، لە کابینەی نۆیەمدا هەشت بەنداو دروست کراون و چەندین بەنداوی تریش لە دروستکردندان؛ کە دەتوانن زیاتر لە 250 ملیۆن مەترسێجا ئاو گل بدەنەوە.

زانیاریی زیاتر: جگە لە بەنداوەکان، 23 پۆند دروست کراون و 58 پۆندی دیکەش لە دروستکردندان. هاوكات چەندین پرۆژەی گرنگ بۆ دابینکردنی ئاوی پاک جێبەجێ دەکرێن، ئەو پڕۆژانەش بۆ دەیان ساڵ کێشەی ئاو لە زۆربەی شارەکانی کوردستان بنبڕ دەکەن كە گرنگترینیان پرۆژەی فریاگوزاریی خێرای ئاوی هەولێر و پڕۆژەی ستراتیژیی ئاوی دووكان-سلێمانییە.

بۆچی گرنگە: جگە لە گلدانەوەی ئاو بۆ پاراوكردنەوەی ئاوی ژێرزەوی و ئاودێریی كشتوكاڵ، ئاوی بەنداو و پۆندەكان، بۆ مەبەستی بەرهەمهێنانی کارەبا، گەشتیاری و چەندین بواری تریش سوود بە هەرێمی كوردستان دەگەیەنن.