دانیشتنی پەرلەمانی عێراق گرژیی تێکەوت و بڕگە پەسەندکراوەکانیشی "هەڵوەشێنرایەوە"

ئاڤا نیوز

کۆبوونەوەکەی ئەمڕۆی پەرلەمانی عێراق بەهۆی زیادکردنی بڕگەی دەنگدان لەسەر سەرۆکی ئەنجوومەنی بەڕێوەبردنی دەوڵەت و ئەندامانی ئەنجوومەنی خزمەت لەلایەن شیعەکانەوە، گرژی تێکەوت و دوو پەرلەمانتاری شیعە و سوننە کردیان بە شەڕی دەستەویەخە، بەهۆی شکانی نیسابی دانیشتنیش دانیشتنەکە و بڕگە پەسەندکراوەکانی "هەڵوەشێنرایەوە".

وێنە گەورەکە: بڕیاربوو لە دانیشتنی ئەمڕۆی پەرلەماندا دەنگ لەسەر پێنج پڕۆژەیاسا بدرێت، پێشتریش سەرۆکایەتیی پەرلەمان و سەرۆک فراکسیۆنەکان ڕێککەوتبوون کە بەبێ ڕێککەوتن نابێت هیچ بڕگەیەک بۆ دانیشتنەکانی پەرلەمان زیاد بکرێت، ئەوەی ئەمڕۆش ڕوویدا پێشێلکردنی ئەو ڕێککەوتنەبوو کە 2ی ئاب ڕاگەیێنرا.

لێدوانی فەرمی: ڤیان سەبری، سەرۆکی فراکسیۆنی پارتی لە پەرلەمانی عێراق بە ئاڤا میدیای ڕاگەیاند، فراکسیۆنەکەی ئەوان بایکۆتی کۆبوونەوەی ئەمڕۆی کردبوو، لە کۆبوونەوەکەشدا کە نیسابیشی نەبوو، لیستێکی نۆ کەسی ئەنجوومەنی خزمەتیان هێناوە تا دەنگی لەسەر بدرێت، لە لیستەکەدا یەک ئەندامی سەر بە یەکێتی تێدایە کە ئەویش کوردێکی فەیلییە ولە بەرامبەردا هیچ نوێنەرێکی پارتی و هەرێمی کوردستانی تێدا نیە، دانیشتنەکەش نیسابی یاسایی نەبوو، بۆیە سەرۆکایەتیی پەرلەمانی عێراق کۆبوونەوەکەی ئەمڕۆی هەڵوەشاندەوە.

لەلایەکی دیکەوە: عامر عەبدولجەبار، ئەندامی پەرلەمانی عێراق بە ئاڤا میدیای ڕاگەیاند، لە کۆبوونەوەکەدا لەسەر زیادکردنی بڕگەی دەنگدان لەسەر ئەندامانی ئەنجوومەنی خزمەتی فیدراڵی، گرژیی لەنێوان مەحموود مەشهەدانی، سەرۆکی پەرلەمان و موحسین مەندەلاوی، جێگری یەکەمی سەرۆکدا دروستبوو، سەرۆکی پەرلەمان وتی نابێت بەبێ ڕێککەوتن هیچ بڕگەیەک بۆ دانیشتنی ئەنجوومەن زیاد بکرێت.

لای خۆیەوە، فەرمانگەی ڕاگەیاندنی پەرلەمانی عێراق بڵاویکردەوە، بەهۆی نەبوونی نیسابی یاساییەوە، کۆبوونەوەکەی ئەمڕۆی پەرلەمانی عێراق هەڵوەشێنراوەتەوە.

گۆشەیەکی دیکەی دیمەنەکە: شێروان دووبەردانی، ئەندامی پەرلەمانی عێراقیش بە ئاڤا میدیای ڕاگەیاند، کۆبوونەوەکەی ئەمڕۆی پەرلەمانی عێراق بەهۆی نەبوونی نیسابەوە، بەتەواوی هەڵوەشێنرایەوە.

ئەوەی پێویستە بیزانیت: ئەنجوومەنی خزمەت دامەزراوەیەکی حکومی عێراقە و کارەکانی بە یاسا ڕێکخراوە، ئەرکی ئەم دامەزراوەیە گەشەپێدان و دۆزینەوەی پلەی فەرمانبەرییە لە کەرتی گشتی لەگەڵ چاودێری دامەزراوە کارگێڕییەکان و پەرەپێدانی توانای فەرمانبەران، ئەنجوومەنی دەوڵەتیش دامەزراوەیەکی ڕاوێژپێدانی سەربەخۆیە لە عێراق و سەرۆکەکەی پلەی وەزیرە، ئەرکی ئەم دامەزراوەیەش دەربڕینی بۆچوونی یاساییە لەسەر ئەو بابەتانەی سەرۆکایەتیی ئەنجوومەنی وەزیران، سەرۆکایەتیی کۆمار و سەرۆکایەتیی پەرلەمان ئاراستەی دەکات لەگەڵ یەکلاییکردنەوەی ئەو ناکۆکییانەی لەنێوان وەزارەتەکان و دەستە سەربەخۆکان دەخرێتە بەردەمی، بۆچوونی ئەنجوومەنەکە لەسەر ناکۆکییەکانیش بۆ هەردوولایەنی ناکۆک پابەندکەر دەبێت.

زانیاریی لە پەیامنێرەوە: دەروون مەلا ناجی، پەیامنێری ئاڤا لە بەغدا ڕایگەیاند، بەهۆی ناکۆکی لەسەر کارنامەی دانیشتنی پەرلەمان، لەناو هۆڵی پەرلەمان هەریەکە لە عەلا حەیدەری، پەرلەمانتاری شیعە لەگەڵ ڕەعد دەهلەکی، پەرلەمانی سوننەکان بووەتە شەڕی دەستەویەخەیان و لەیەکتریانداوە.