بانکی ناوەندی پێنج ڕێککار بۆ فراوانکردنی پارەدانی ئەلیکترۆنی ڕادەگەیێنێت

ئاڤا نیوز

پارێزگاری بانکی ناوەندی عێراق دەڵێت، بەردەوامن لە فراوانکردنی هەوڵەکان بە ئامانجی گۆڕینی سەرجەم چالاکییە ئابووریی و بازرگانییەکان بۆ شێوازی پارەدانی ئەلیکترۆنی، بۆ ئەو مەبەستەش پێنج ڕێکاریان دەستپێکردووەو دەیانەوێت بەهۆیانەوە بەکارهێنانی پارەدانی کاش نەهێڵن.

وێنە گەورەکە: لە چوارچێوەی هەوڵەکان بۆ فراوانکردنی ئاڵوگۆڕی بازرگانی و پارەدانی ئەلیکترۆنی لەناوخۆی وڵاتدا، مانگی حوزەیرانی ئەمساڵ بانکی ناوەندی عێراق بڕیاریدا لەکۆتایی ئەمساڵدا کارتێکی یەکگرتووی بانکی دەربکات کە تەنیا بۆ مامەڵەکردن بە دینار بەکاردەهێنرێت.

لێدوانی فەرمی: عەلی عەلاق، پارێزگاری بانکی ناوەندیی عێراق لە میانەی بەشداریکردنی لە کۆنگرەی گۆڕانکاری گشتگیر بە ئاراستەی پارەدانی ئەلیکترۆنی کە ئەمڕۆ لە بەغدا بەڕێوەچوو، وتی: پاڵپشت بە باشترین ڕێکار و بنەما نێودەوڵەتییەکان کار بۆ فراوانکردنی پارەدانی ئەلیکترۆنی دەکەن و بۆ ئەو مەبەستەش پێنج پڕۆژەی نیشتیمانییان هەیە ئەوانیش بریتیین لە:

یەکەم: دانانی سیستمێک بۆ ئاڵوگۆڕی پارەدانی ئەلیکترۆنی بەشێوەی 24 کاتژمێریی و بەدرێژایی هەر حەوت ڕۆژەکەی هەفتە.

دووەم: گۆڕینی هەموو شێوازەکانی پارەدانی حکومییە بۆ ئەلیکترۆنی ئەوەش یاریکردن بە پارەوە ناهێڵێت و متمانەش زیاتر دەکات.

سێیەم: دانانی نەخشەڕێگایەکی نیشتیمانی بۆ کارتە بانکییەکان کە سەروەری سیستمی ئەلیکترۆنی دەپارێزێت و پشتبەستن بە سیستمە دەرەکییەکان کەمدەکاتەوە.

چوارەم: زیادکردنی ئاڵوگۆڕە ئەلیکترۆنییەکان و گەرەنتیکردنی خێرایی و پارێزراوی پرۆسەکان.

پێنجەم: دروستکردنی هاوبەشی لەگەڵ دامەزراوە هەرێمیی و نێدەوڵەتییەکان بۆ سوود وەرگرتن لە ئەزموونەکانیان لەبواری پارەدانی ئەلیکترۆنی.

زانیاریی زیاتر: عەلی عەلاق ئەوەشی خستەڕوو، زیادبوونی پارەدانی ئەلیکترۆنی بەڕێژەی 10% دەکرێت هاوکاربێت بۆ باشتربوونی بەرهەمی ناوخۆیی و پشتیوانی بوژانەوەی ئابووریی وڵات، بۆ ئەو مەبەستەش داوا لە هاووڵاتیان، دەزگاکانی ڕاگەیاندن، دامەزراوەکان و ڕێكخراوەکانی کۆمەڵگەی مەدەنی دەکەن هاوکاری سەرخستنی ئەم پڕۆسەیە بن.