ئایا سبەی لە بەغدا و 6 پارێزگای دیکە دەبێتە پشووی فەرمی؟

ئاڤا نیوز


پێشبینی دەکرێت پلەکانی گەرما لە بەغدا و چەندین پارێزگای دیکە ژمارەی پێوانەیی تۆمار بکەن و سبەی یەکشەممە بگەنە 50 پلە یان زیاتر.

ئەوەی پێشبینی دەکرێت: بەگوێرەی پێشبینییەکانی دەستەی کەشناسیی عێراق "بەرزترین پلەکانی گەرما بۆ سبەی یەکشەممە لە زیقار 51 پلە و لە بەسڕە، موسەننا، میسان، واست، کەربەلا و بەغدا 50 پلەی سەدی دەبێت."

لەلایەکی دیکەوە: بەگوێرەی ڕاگەیێنراوی کەشناسیی هەرێمی كوردستان: ئەمڕۆ شەممە ئاسمان ساماڵ دەبێت و پلەكانی گەرماش هاوشێوەی دوێنی دەبن، بەڵام سبەی پلەكانی گەرما دوو پلە بەرز دەبنەوە.

لەهەمان کاتدا: شێخ دارا، پێشكەشكاری كەشوهەوای ئاڤا میدیا ڕایگەیاند: تاوەكو ناوەڕاستی ئەم مانگە پلەكانی گەرما ڕوو لە بەرزبوونەوە دەبن و دوای ئەوە وردە وردە نزم دەبنەوە.

ئەوەی پێویستە بیزانیت: ڕاگرتنی دەوام لە کاتی شەپۆلە گەرما بەهێزەکاندا تەنیا ڕێکارێکی کارگێڕی نییە، بەڵکو ئامانج لێی پاراستنی تەندروستیی هاووڵاتییانە.

ئەوەی چاوەڕوان دەکرێت: پێدەچێت دەوامی فەرمی لە پارێزگاکانی وەک بەسڕە، میسان، زیقار، واست و بابل ڕابگیرێت بەپێی ئەو دەسەڵاتەی لەلایەن ئەمینداریەتیی گشتیی ئەنجوومەنی وەزیران بە پارێزگارەکان دراوە.

بە تەنیشت ئەم بابەتەوە: سەبارەت بە بەغدا، ڕاگرتنی دەوام بە بژاردەیەکی بەردەستی حکومەت دادەنرێت، بەڵام جێبەجێکردنی پێویستی بە دەرکردنی بڕیارێکی فەرمی هەیە.