گەرمای بەسرە لەسەرووی نیوەی پلەی کوڵانە و ئاڵای مۆر هەڵکرا

ئاڤا نیوز


نیوەڕۆی ئەمڕۆ یەکشەممە لە پارێزگای بەسرەی ئەوپەڕی باشووری عێراق، پلەکانی گەرما گەیشتنە سەرووی نیوەی پلەی کوڵان و بەهۆی زیانەکانی گەرماش لەم پلەیەدا، ئاڵای مۆر هەڵکراوە کە مانای وایە بەهیچ شێوەیەک مەچنەبەر تیشکی خۆر.

بینراو و بیستراو: لە تۆڕە کۆمەڵایەتییەکان دیمەنی ڤیدیۆیی ناوچەی ئەبو سخیەری پارێزگای بەسرە بڵاوکراوەتەوە، لەم ناوچەیەدا کۆمپانیایەک کار دەکات و بەهۆی بەرزبوونەوەی پلەکانی گەرما بۆ سەرووی 50 پلەی سیلیزی، ئاڵای ڕەنگی مۆری هەڵکردووە و داوای لە کارمەندەکانی کردووە بەهیچ شێوەیەک مەچنە بەر تیشکی خۆر.

ڕاگەیێنراوی فەرمی: دەستەی کەشناسی عێراق بڵاویکردەوە، سبەی دووشەممە لە بەغدا، کەربەلا، نەجەف، بابل، زیقار و موسەننا پلەکانی گەرما 50 بۆ 51 پلە دەبێت، واست و دیوانییە 49 پلە، میسان، ئەنبار، دیالە و سەڵاحەددین 48 پلە، دهۆک و سلێمانی 43 پلە، هەولێر 45 پلە و نەینەواش 46 پلەی سیلیزی دەبێت.

ئاڵای ڕەنگی مۆر (بنەوشەیی) لەکاتێکدا هەڵدەکرێت کە پلەکانی گەرما دەگاتە سەرووی پلەی کوڵان (50ی سلیزی)، ئەویش مانای کاریگەری تیشکی سەروبنەوشەیی لەسەر پێست و چاو لەم پلەی گەرمییەدا "مەترسیدارە"، بۆیە ڕێنمایی هاووڵاتیان بەگشتی و بەتایبەت ئەوانە دەکرێت کە ماوەی کارکردنیان لەبەرامبەر تیشکی خۆرە، لە ماوەی هەڵکردنی ئاڵاکەدا بەهەموو شێوەیەک خۆیان لە چوونەبەردەم تیشکی خۆر بەدووربگرن.