شاخەوان عەبدوڵڵا: هەناردەكردنەوەی نەوتی کوردستان گەیشتووەتە قۆناغی كۆتایی

ئاڤا نیوز

جێگری سەرۆكی پەرلەمانی عێراق لەبارەی كاری لیژنە پێكهێنراوەكانی بەغدا بۆ پرسی مووچە و نەوتی هەرێمی كوردستان دەڵێت، "بۆ هەناردەكردنەوەی نەوت گەیشتوونەتە ڕێككەوتن، بەڵام لەبارەی داهاتە نانەوتییەكان گفتوگۆكان بەردەوامن."

چیرۆکی سەرەکی: ئەمڕۆ كۆبوونەوەی ئەنجوومەنی وەزیرانی عێراق بەڕێوەچوو، چاوەڕوان دەکرا سوودانی بڕیار لەسەر مووچەی مانگی شەشی فەرمانبەرانی هەرێمی كوردستان بدات، بەڵام ئاڤا زانیویەتی باسی ئەو بابەتە نەکراوە. ئەمەش لە کاتێکدا؛ ڕاپۆرتی ئەو لیژنەیە تەواو کراوە کە هەفتەی ڕابردوو بۆ بابەتی نەوت و داهاتە نانەوتییەكان، ڕاسپێردرابوون.

لێدوانی فەرمی: د. شاخەوان عەبدوڵڵا، جێگری سەرۆكی پەرلەمانی عێراق لە كۆنفرانسێكی ڕۆژنامەوانیدا ڕایگەیاند، ئەو لیژنانەی پێكهێنراون، دوو بابەت تاوتوێ دەكەن؛ ئەوانیش هەناردەكردنەوەی نەوت و داهاتە نانەوتییەكانە، بەخۆشحاڵییەوە لە دۆسیەی نەوت گەیشتووینەتە ڕێككەوتن و هەنگاوی گەورەی بەرەو قۆناغی كۆتایی بڕیوە، ئەوەی ماوەتەوە دۆسیەی داهاتە نانەوتییەكانە كە گفتوگۆكان لەبارەیەوە بەردەوامە.

ئەوەی پێویستە بیزانیت: ئاڤا زانیویەتی، وەزارەتی دارایی و ئابووری حکومەتی هەرێمی کوردستان بە  تەیف سامی، وەزیری دارایی عێراقی ڕاگەیاندووە، تەنیا بۆ مانگی شەش دەتوانرێت 120 ملیار دینار وەک داهات ڕەوانە بکرێت. بۆ مانگی حەوت داهات ناگاتە 120 ملیار دینار، بۆیە ئەو بڕە کەم دەبێتەوە و لەسەر ئەو پرسە شاندێک دەچێتە بەغدا.