کوژانەوەی کارەبای عێراق کاریگەری لەسەر کارەبای هەرێمی کوردستان نابێت

ئاڤا نیوز

لە دوای نیوەڕۆی ئەمڕۆوە کارەبای تۆڕی هەموو عێراق دووچاری کوژانەوەی گشتیی بووەتەوە، بەوهۆیەوە ئەو بڕە کارەبایەی لە هەرێمی کوردستانەوە دەنێردرا، ئەویش ڕاگیراوە. بەڵام هیچ کاریگەرییەکی لەسەر کارەبای کوردستان نەبوو.

وێنە گەورەکە: ئەمڕۆ دووشەممە کوژانەوەیەکی گشتیی لە کارەبای نیشتمانی تەواوی عێراق دروستبوو، ئەمەشەوە شەپۆلێکی ناڕەزایەتیی لە سۆشیاڵ میدیای عێراقی بەدوای خۆیدا هێنا. 

لێدوانی فەرمی: سەرچاوەیەک لە وێستگەی کارەبای غازی هەولێر بە ئاڤا میدیای ڕاگەیاند، ئەمڕۆ لە کاتژمێر 3ـی دوای نیوەڕۆوە دوو یەکەی بەرهەمهێنانی کارەبا کە تایبەتە بەو کارەبایەی دەنێردرێت بۆ شارەکانی دیکەی عێراق وەستاوە، ئەمەش بەهۆی ئەو پچڕانە گشتییەیەی لە کارەبای نیشتمانی عێراق ڕوویداوە، بەڵام هیچ کاریگەرییەکی لەسەر کارەبای کوردستان نەبووە.

ئەو سەرچاوەیە وتیشی، یەکێک لە یەکەکان داگیرسێنراوەتەوە، بەڵام ئەوەی تر نەتوانراوە دابگیرسێنرێتەوە.

ئەوەی پێویستە بیزانیت: لە پارێزگای هەولێر لە هەردوو وێستگەی کارەبای غازیی هەولێر و وێستگەی خورمەڵە کارەبا بۆ مووسڵ و شارەکانی دیکەی عێراق دەنێردرێت و بڕەکەی 1100 مێگاوات کارەبایە. 


نوێدەکرێتەوە..