سەرۆك بارزانی لەگەڵ شاندێكی شێخ و كەسایەتیی هۆزەكانی عێراق كۆ بووەوە

ئاڤا نیوز

لە سەڵاحەددین، سەرۆك بارزانی پێشوازیی لە شاندێكی شێخ و كەسایەتییەكانی هۆزەكانی پارێزگاكانی عێراق كرد و  لەمیانەدا ڕۆڵی هۆزەكانی عێراقی لە پاراستنی ئاشتیی كۆمەڵایەتی و ڕۆحی پێكەوەژیان لەنێوان ڕۆڵەكانی نیشتمان بەرز نرخاند.

وێنە گەورەكە: ڕۆژی دووشەممە 11ی ئابی 2025 لە سەڵاحەددین سەرۆك مەسعود بارزانی پێشوازی لە شاندێكی شێخەكان و كەسایەتیی هۆزەكانی پارێزگاكانی عێراق کرد.

ڕاگەیێنراوی فەرمی: بارەگای بارزانی بڵاوی كردەوە: لە دیدارەكەدا سەرۆك بارزانی بە گەرمی بەخێرهێنانی شاندی میوانی كرد و ڕۆڵی هۆزەكانی عێراقی لە پاراستنی ئاشتیی كۆمەڵایەتی و ڕۆحی پێكەوەژیان لەنێوان ڕۆڵەكانی نیشتیمان بەرز نرخاند.

- هەر لەو دیدارەدا شاندی میوان جەختیان لە بڕوای پتەوی خۆیان لەمەڕ یەكڕیزیی عێراقییەكان كردەوە وەك بنەمایەك بۆ سەقامگیری و هەروەها دیالۆگیشیان وەك باشترین ڕێگە بۆ چارەسەركردنی  كێشەكان لە قەڵەمدا.

- شاندی میوان پشتگیریی خۆیان بۆ ڕوانگەی مەرجەعیەتی باڵای ئایینی لە نەجەفی ئەشرەف دووپات كردەوە كە چەك تەنیا لە دەستی دەوڵەتدا بێت و یاسا باڵادەست بێت و دادپەروەری لەنێوان هاووڵاتیان بەدی بێت.

- شاندی میوان هەر جۆرە دەستێوەردانی دەرەكییان لە كاروباری عێراق ڕەت كردەوە و جەختیان لەوە كردەوە كە عێراقییەكان ئەو توانایەیان هەیە كە كێشەكانیان لەڕێگەی دیالۆگ و یەكترقبووڵكردن دوور لە جەمسەرگیرییە هەرێمی و دەولییەكان چارەسەر بكەن.

- بەشداربووان جەختیان لە بەردەوامیی هەماهەنگی و پەیوەندی لەنێوان پێكهاتەكانی عێراق و كاركردن لەپێناو عێراقێكی فیدراڵی و سەقامگیر و ئاسوودە كردەوە كە تێیدا پارێزگاری لە كەرامەتی هەموو هاووڵاتیان دەكرێت لە هەولێر هەتا بەسرە و لە مووسڵ هەتا ناسرییە.