خواردنی توێکڵی مۆز چارەسەری چەندین کێشەی تەندروستی دەکات

ئاڤا نیوز

مۆز بە یەکێک لە میوە بەناوبانگەکانی جیهان دادەنرێت، بەپێی توێژینەوە پزیشکییەکان خواردنی توێکڵی مۆز چەندین سوودی تەندروستیی هەیە، دیارترینیان یارمەتیدانی پڕۆسەی هەرسکردنە.

چیرۆکی سەرەکی: بەپێی ماڵپەڕی پزیشکیی "very well health"،  توێکڵی مۆز ڕێژەیەکی بەرز لە ڕیشاڵی تواوە و نەتواوەی تێدایە، ئەم ڕیشاڵەیە یارمەتیی ڕێکخستنی هەرسکردن و کەمکردنەوەی قەبزی و سکچوون دەدات.

ئەوەی پێویستە بیزانیت: جگە لە ڕیشاڵ، توێکڵی مۆز بڕێکی زۆر پۆتاسیۆمی تێدایە کە بۆ هەر توێکڵێک نزیکەی هەزار و 25 میلیگرام دەبێت، جگە لە مەگنیسیۆم و کالیسیۆم و بڕێکی کەمی ئاسن و زینک. پۆتاسیۆم گرنگە بۆ ڕێکخستنی هاوسەنگیی شلە و فشاری خوێن و یارمەتیدەرە بۆ ڕێگریکردن لە بەرزبوونەوەی فشاری خوێن.

زانیاریی زیاتر: ئەو ڕیشاڵ و پۆلیفینۆڵانەی لە توێکڵی مۆزدا هەن یارمەتیدەرن بۆ دابەزاندنی ئاستی کۆلیسترۆڵی زیانبەخش. هاوکات ڕیشاڵەکان هەڵمژینی کاربۆهیدرات خاو دەکەنەوە و پاڵپشتیی ئاستی جێگیریی شەکری خوێن دەکەن، ئەمەش گرنگە بۆ ئەو کەسانەی کە نەخۆشی شەکرەی جۆری دوویان هەیە.

ئەمەش بزانە: دەتوانرێت توێکڵی مۆز بە چەند ڕێگەیەک بخورێت لەوانە:

- کوڵاندنی توێکڵی مۆز و بەکارهێنانی لەناو شەربەت و چا.

- تێکەڵکردنی لەگەڵ هەویری نان و کێک.

- بەکارهێنانی لەنێو شۆربادا.