عێراق لە 62 تریلیۆن دینار داهات تەنیا پێنج تریلیۆنی بۆ هەرێمی کوردستان خەرج کردووە

ئاڤا نیوز

بەپێی ڕاپۆرتی فەرمیی وەزارەتی دارایی عێراق سەبارەت بە داهات و خەرجییەکانی شەش مانگی یەکەمی ساڵی 2025، کۆی داهاتەکانی دەوڵەت گەیشتووەتە 62 ترلیۆن دینار و 92%ـی ئەم داهاتە لەسەر نەوت بووە. لە هەمان ماوەدا تەنیا 5 تریلیۆن دینار بۆ هەرێمی کوردستان خەرج کراوە.

بڵاوکراوەی فەرمی: وەزارەتی دارایی عێراق ئەو داتا و خشتانەی بڵاوکردەوە کە تایبەتن بە حیساباتی دارایی نیوەی یەکەمی ئەمساڵ.

ژمارەکان وادەڵێن: داهاتەکان بەم شێوەیە بوون:

٠ کۆی گشتیی داهات: 62 تریلیۆن و 3 ملیار و 937 ملیۆن دینار.

٠ داهاتی نەوت: 57 تریلیۆن و 52 ملیار و 854 ملیۆن دینار.

٠ داهاتی نانەوتی: 4 تریلیۆن و 951 ملیار و 282 ملیۆن دینار.

ئەم ژمارانە دەری دەخەن بودجەی عێراق بە ڕێژەی 92% پشتی بە داهاتی نەوت بەستووە و تەنها 8%ـی لە سەرچاوەی دیکەی وەک باج و ڕسوماتەوە بووە.

خەرجیی مووچە: لە کۆی گشتیی داهاتەکان بەشێکی زۆر بۆ مووچەی فەرمانبەران و خەرجییە کۆمەڵایەتییەکان ڕۆیشتووە، بڕی 30 ترلیۆن و 25 ملیار و 45 ملیۆن دینار بۆ مووچەی فەرمانبەران خەرج کراوە. ئەمەش واتای ئەوەیە کە نزیکەی 48%ـی کۆی داهاتی شەش مانگی یەکەمی دەوڵەت تەنیا بۆ مووچەی فەرمانبەران خەرج کراوە.

پشکی هەرێمی کوردستان: ڕاپۆرتەکە بە ڕوونی ئاماژەی بەو بڕە پارانە کردووە کە بۆ هەرێمی کوردستان خەرج کراون و ئەو داهاتانەی لێی وەرگیراون:

٠ پارەی خەرجکراو بۆ هەرێمی کوردستان: لە خشتەی خەرجییە گشتییەکاندا کۆی گشتیی خەرجی بریتی بووە لە 5 تریلیۆن و 166 ملیار و 760 ملیۆن دینار.

٠ داهاتی وەرگیراو لە هەرێمی کوردستان: لە بەشی داهاتەکان بە ڕوونی ئاماژە بەوە کراوە کە "داهاتە نانەوتییەکان کە لە هەرێمی کوردستانەوە ڕادەستی گەنجینەی دەوڵەت کراوە" بڕەکەی 319 ملیار و 346 ملیۆن دینار بووە.