زیاتر لە هەشت هەزار زیارەتکاری بیانی لە دەروازەی حاجی ئۆمەرانەوە هاتووچۆیان کردووە

ئاڤا نیوز

بەپێی بەڕێوەبەری دەروازەی سنووریی تەمەرچین – حاجی ئۆمەران هاتووچۆی زیارەتکارانی بیانی لە دەروازەکە بەراورد بە ساڵی ڕابردوو بە ڕێژەی 20% زیادی کردووە.

چیرۆکی سەرەکی: ساڵانە ملیۆنان زیارەتکار بە مەبەستی بەشداریکردن لە ڕێوڕەسمەکانی چلەی ئیمام حوسێن سەردانی مەزارگەکانی شیعە مەزهەب لە عێراق دەکەن، زۆرینەی زیارەتکارانیش خەڵکی ناوچە جیاوازەکانی ئێرانن و بەشێکیشیان زیارەتکاری بیانین و لە ڕێگەی ئێرانەوە هاتووچۆی عێراق دەکەن.

لێدوانی فەرمی: محەممەد ڕەزایی، بەڕێوەبەری دەروازەی سنووریی تەمەرچین بە ئاژانسی فەرمیی ئێرانی ڕاگەیاندووە، تاوەکو ئەمڕۆ زیاتر لە هەشت هەزار زیارەتکاری بیانی بۆ بەشداریکردن لە ڕێوڕەسمەکانی چلەی ئیمام حوسێن لە ڕێگەی دەروازەی سنووریی تەمەرچین – حاجی ئۆمەرانەوە هاتووچۆیان کردووە.

ئەوەی پێویستە بیزانیت: زیارەتکارانی بیانی لە وڵاتانی قەوقاز و وڵاتانی ئاسیای ناوەڕاست وەک تورکیا، ئازەربایجان، جۆرجیا و تەنانەت ڕووسیاش بۆ بەشداریکردن لە ڕێوڕەسمەکانی چلەی ئیمام حوسێن لە ڕێگەی دەروازەکانی ئێرانەوە هاتووچۆی عێراق دەکەن.

زانیاریی زیاتر: دەروازەی سنووریی تەمەرچین – حاجی ئۆمەران یەکێک لەو شەش دەروازەیە، کە ئێران بۆ هاتووچۆی زیارەتکارانی چلەی ئیمام حوسێن تەرخانی کردوون، دەروازەکان بریتین لە "تەمەرچین لە حاجی ئۆمەران، باشماغ لە پێنجوێن، خوسرەوی لە خانەقین، چەزابە لە عەمارە، شەلەمچە لە بەسرە و میهران لە بەدرە."