دادگای سلێمانی: سكاڵا لەسەر شاسوار عەبدولواحید تۆمار بكەن

ئاڤا نیوز

جێگری سەرۆكی دادگای سلێمانی ڕایدەگەیەنێت، هەركەسێك لە پرۆسەی كڕینی پشكەكانی چاڤی لاند زەرەرمەند بووە و خۆی بە خاوەن ماف دەزانێت، با سكاڵا لەسەر شاسوار عەبدولواحید، سەرۆکی جوڵانەوەی نەوەی نوێ تۆمار بكات.

وێنە گەورەكە: نزیكەی هەشت هەزار كەس، پشكەكانی پرۆژەی چاڤی لاندیان كڕیوە و دوای تێپەڕبوونی 11 ساڵ بەسەر ئەو گرێبەستە، خاوەن پشكەكان نەك تەنیا لە قازانجی كڕینی پشكەكان سوودمەند نەبوون، بەڵكو قەناعەتیان لا دروستبووە كە پارەی كڕینی پشكەكانیشیان لەدەستچووە.

لێدوانی فەرمی: دادوەر سەڵاح محەممەد، جێگری سەرۆكی دادگای سلێمانی بە ئاڤای ڕاگەیاند، شاسوار عەبدولواحید، وەك تۆمەتبار خۆی نەهاتووەتە بەردەم یاسا، بەڵكو بە هێزی دەسەڵاتی جێبەجێكردن دەستگیر كراوە، لەسەر ئەو بنەمایەش؛ دوای یەكلایی بوونەوەی ئەو دۆسیەیەی كە ئێستا لەسەری دەستگیرکراوە، سەرجەم ئەو كەسانەی باوەڕیان وایە مافیان لای تۆمەتبار هەیە و پێی نەداون، لە دادگا سكاڵا لەسەری تۆمار بكەن.

جێگری سەرۆكی دادگای سلێمانی ئەوەشی باسكرد، لە ماوەی شەش مانگدا هەوڵدەدرێت سەرجەم دۆسیەكانی سەر شاسوار عەبدولواحید یەكلایی بكرێتەوە و هەر كەسێك خۆی بە خاوەن ماف دەزانێت، دەتوانێت سكاڵای لەسەر تۆمار بكات؛ ئەو ئێستا وەك تۆمەتبار لەبەردەم دادگایە نەوەك سەرۆكی جووڵانەوەیەكی سیاسی، دەستگیركردن و حوكمدانی، بابەتێكی تەواو یاساییە و ڕەهەندێكی سیاسی نییە.

باکگراوند: شەوی 12 لەسەر 13ی ئەم مانگە، شاسوار عەبدولواحید، سەرۆکی جوڵانەوەی نەوەی نوێ لە گوندی ئەڵمانی، کە شوێنی مانەوەکەی لەوێیە، لەلایەن هێزێکی ئەمنیی دەمامکدار لە شاری سلێمانی دەستگیرکرا.