قوتابییەکی زانکۆی گەرمیان هەڵەیەکی پزیشکیی زانستیی دەدۆزێتەوە

ئاڤا نیوز

کچە قوتابییەکی بەشی پزیشکیی زانکۆی گەرمیان هەڵەیەکی پزیشکی لە ئەپلیکەیشنی (Human Anatomy Atlas) دەدۆزێتەوە و تیمەکە ئاگادار دەکاتەوە.

چیرۆکی سەرەکی: سایە حەسەن، خەڵکی کەلارە، قۆناغی سێیەمی بەشی پزیشکیی زانکۆی گەرمیانە، ئەو قوتابییە لەکاتی بەدواداچوونی زانستی، لە ئەپلیکەیشنێکی پزیشکی هەڵەیەک دەدۆزێتەوە و تیمی ئەپلیکەیشنەکە لەو هەڵەیە ئاگادار دەکاتەوە.

لێدوانی فەرمی: سایە حەسەن، بە ئاڤای گوت: دوای ئەوەی لە بەشی سەر و مل (head & Neck region)ی ئەپڵیکەیشنی (Human Anatomy Atlas) دەمخوێندەوە و زانیاریم وەردەگرت، بینیم خوێنبەرێکی چەناگە بەهەڵە کێشرابوو، بۆیە تیمی ئەو ئەپلیکەیشنەم بە ئیمەیل لەو هەڵەیە ئاگادار کردەوە، دوای ناردنی وردەکارییەکان تیمی ئەپلیکەیشنەکە سوپاسیان کردم و لە ئەپدەیتی نوێ ئەو هەڵەیە چاک دەکەنەوە.

بۆچی گرنگە: بچوکترین هەڵەی پزیشکی ڕەنگە گیانی دەیان مرۆڤ بخاتە مەترسییەوە، دۆزینەوەی ئەو هەڵەیە و ڕاستکردنەوەی دەبێتە بەشێک لە هەوڵەکانی ڕێگری لەو مەترسیانەی بەهۆی هەڵەی پزیشکییەوە ڕوودەدەن.

زانیاریی زیاتر: (Human Anatomy Atlas) ئەپلیکەیشنێکی نێودەوڵەتییە و زانیارییەکانی لە چوار سەرچاوەی باوەڕپێکراو وەرگیراوە، سەرچاوەکانیش ئەمانەن:

Gray's Anatomy

Netter's Atlas of Human Anatomy

Moore's Clinically Oriented Anatomy

Grant's Atlas