قایمقامی هەولێر: هەر کەسێک دوور لە یاسا ڕێکلام بکات سزا دەدرێت

ئاڤا نیوز

قایمقامی قەزای ناوەندیی هەولێر ڕایدەگەیێنێت، لە هەرێمی کوردستان ڕێکلامکردن بە یاسا ڕێکخراوە، هەرکەسێک پابەند نەبێت سزا دەدرێت.

وێنە گەورەکە: لە ماوەی ڕابردوو لە هەرێمی کوردستان هەندێک کەس بەناوی مۆدێل و تیکتۆچی لە سۆشیال میدیا ڕێکلامی بازرگانییان دەکرد کە ناڕەزایی لەلایەن هاووڵاتیانی لێکەوتووە، لەلایەن ئاسایش و لیژنەکانی قایمقامیەتی هەولێر دەستگیر کران و لێکۆلینەوەی یاساییان بەرامبەر کرا.

لێدوانی فەرمی: نەبەز عەبدولحەمید، قایمقامی قەزای ناوەندیی هەولێر، لە میانەی بەشداریکردنی لە بەرنامەی مۆری ئاڤا ڕایگەیاند، لە هەرێمی کوردستان دوو جۆر ڕێکلام هەیە، یەکێکیان لەسەر شەقام و شۆستەکان و شوێنە گشتییەکان، ئەوەی دیکەیان لەڕێگەی سۆشیاڵ میدیاوە دەکرێت.

جۆری یەکەم: بەپێی یاسا و ڕێنماییەکان ڕێکخراوە کە چەند کۆمپانیایەک لەگەڵ سەرۆکایەتیی شارەوانی هەولێر ڕێكەوتنیان هەیە، پێش ئەوەی شوێنە بازرگانییەکە ڕێکلام بکات، دەبێت ڕەزامەندی سەرۆکایەتیی شارەوانی هەبێت کە دەبێت شوێنەکەی دیار بێت و قەبارەی ڕێکلامەکەش دیار بێت. هاوکات، هەڵسەنگاندن بۆ ڕێکلامەکە دەکرێت کە تا چەند لەگەڵ داب و نەریتی کورستان دەگونجێت.

جۆری دووەم: "کەمێک ئەستەمە، بەڵام بەردەوام چاودێری هەموو ئەو ڕێکلامانە دەکەین کە کاریگەریی خراپیان هەیە لەسەر کۆمەڵگە، یان ئەو کەسانەی دەرمان و خۆراک یان هەر شتیكی دیکە لەڕێگەی سۆشیاڵ میدیاوە دەفرۆشن، ئەگەر فەرمی نەبن سزادەدرێن و چەندین کەسمان دەستگیر کردووە".

باکگراوند: دوای بڵاوبوونەوەی گرتەڤیدیۆیەک لەلایەن کچە مۆدێلێک کە بەنزین دەڕێژێت و هەندێ دەستەواژە بەکاردێنێت و بە ڕووداوەکەی چەند ڕۆژی ڕابردووی بەنزینخانەکەی شاری هەولێری دەبەستێتەوە کە تێیدا سێ کەس کوژران، ئەم ڕیکلامەش، کاردانەوە و ناڕەزایەتی زۆری لێکەوتەوە. ئێوارەی ئەمڕۆ لەلایەن لیژنەکانی قایمقامیەت و ئاسایشی هەولێر ئەو کچە مۆدێلە دەستگیر کرا.