هەڵمەتێكی فراوانی شووشتن و خاوێنكردنەوەی سەنتەری شاری هەولێر بەڕێوەچوو

ئاڤا نیوز

هەڵمەتێكی شووشتن و خاوێنكردنەوەی سەنتەری شاری هەولێر بەڕێوەچوو كە ژمارەیەك ژینگەپارێزی سەر بە بەڕێوەبەرایەتیی خزمەتگوزاریی ژینگەی هەولێر ئەنجامیاندا.

لێدوانی فەرمی: ژیار جەلال، بەڕێوەبەری خزمەتگوزاریی ژینگەی هەولێر، تایبەت بە ئاڤا ڕایگەیاند، بەو پێیەی لە ڕۆژانی پشووی كۆتایی هەفتە و بۆنە و مەراسیمەكاندا، سەنتەری شاری هەولێر بەتایبەتیش دەوروبەری قەڵای هەولێر و بازاڕی قەیسەری، زۆرترین ژمارەی گەشتیار و سەردانیكاری ناوخۆیی و بیانی ڕووی تێدەكەن، پێویستی بە بایەخدانێكی تایبەت هەیە و تیمەكانمان بە بەردەوام ئەو شوێنە بە پاكی ڕادەگرن.

بەڕێوەبەری فەرمانگەی خزمەتگوزاریی ژینگەی هەولێر ڕوونیشی كردەوە، بۆ خاوێنكردنەوەی سەنتەری شاری هەولێر، 50 كارمەندی ژینگەدۆستمان هەیە كە بەشێوەی ڕۆتینی ڕۆژانە، هەڵمەتی پاككردنەوە ئەنجام دەدەن، بەڵام دوای پشووی ڕۆژانی هەینی و بۆنە و جەژنەكان، پێویستە هەڵمەتەكە بەشێوەیەكی فراوانتر و چڕتر ئەنجام بدرێت.

 ئەوەی پێویستە بیزانیت: بەڕێوەبەرایەتیی خزمەتگوزاریی ژینگەی هەولێر، ڕۆژانە دوو هەزار تۆن زبڵ و خاشاک لە سەنتەری شاری هەولێر و قەزا و ناحییەکانی كۆ دەكاتەوە و لە زبڵخانەی کانی قرژاڵە ژێرخاکی دەكات.

زانیاریی زیاتر: لە سنووری پارێزگای هەولێر هەزار و 297 كارمەندی ژینگەدۆست هەن كە بە ئەركی خاوێنكردنەوەی شەقام و شوێنە گشتییەكان هەڵدەستن بۆ ئەوەی لەڕووی بایەخی گەشتیارییەوە بە جوانترین شێوە دەربكەون.