پلەکانی گەرما دادەبەزن و بارستە هەوایەکی فێنک ڕوو لە کوردستان دەکات

ئاڤا نیوز

بەپێی پێشبینییەکانی کەشوهەوا، شەپۆلی گەرما کاریگەرییەکەی بەرەو لاوازبوون دەچێت و گەرمای هاوین ئاسایی دەبێتەوە، بارستە هەوایەکی فێنک ڕوو لەناوچەکانی هەرێمی کوردستان دەکات.

لێدوانی فەرمی: هەڤاڵ سەدیق گەڵۆزی، شارەزای بواری کەشناسی ڕایگەیاندووە، شەپۆلی گەرما بەشێوەی قۆناغ بە قۆناغ پاشەکشە دەکات و کاریگەرییەکەی بەرەو لاوازبوون دەچێت، لەهەمان کاتدا بارستەهەوایەکی فێنک جێگەی دەگرێتەوە و بۆ ماوەی چەند ڕۆژێکی دیاریکراو گەرمای هاوین ئاسایی دەبێتەوە.

ئەوەی پێشبینی دەکرێت: بەپێی پێشبینییەکان، لە ئەمڕۆ شەممەوە 16-8-2025، بەهۆی هاتنی بارستە هەوایەکی فێنک بۆ تەواوی ناوچە جیاوازەکانی هەرێمی کوردستان، پلەکانی گەرما دوو پلەی سیلیزی دابەزین بەخۆیەوە دەبینێت و لە ڕۆژی یەکشەممەوە کاریگەری ئەو بارستە هەوایە لەسەر ناوچەکانی میسر، شام، هەرێمی کوردستان و عێراق زیاتر دەبێت و لە شەواندا پلەکانی گەرما لە ناوچە شاخاوییەکانی هەرێمی کوردستان دابەزینی زیاتر بەخۆیەوە دەبینێت.