ڕووپێوی كەشوهەوای كوردستان بۆ دڵنیابوون لە نەبوونی تیشكە زیانبەخشەكان دەكرێت

ئاڤا نیوز

لەپێناو دڵنیابوونەوە لە نەبوونی ماددەی تیشكاوەر (تیشكە زیانبەخشەكان) لە بەرگە هەوای هەرێمی كوردستان، هەردوو حكومەتی هەرێمی كوردستان و حكومەتی فیدراڵ بە هەماهەنگیی، ڕووپێوی بۆ كەشوهەوای شارەكان و ناوچە ئاوەدانەكانی هەرێمی كوردستان دەكەن.

چیرۆكی سەرەكی: شاندێكی حكومەتی فیدراڵ شارەزا لە ماددە تیشكاوەرەكان بە سەرۆكایەتی د. حامد ئەلباهیلی، ئەندامی دەستەی ڕاوێژكاران لە ئەنجوومەنی وەزیرانی حكومەتی فیدراڵ، سەردانی دەستەی پاراستن و چاككردنی ژینگەی هەرێمی كوردستانیان كرد و لەلایەن د. عەبدولحەكیم خەسرۆ، سەرۆكی دەستە بەوەكالەت، ئەندازیار عەبدولڕەحمان سدیق، سەرۆكی پێشووی دەستەی ژینگە و ڕاوێژكاری ئەنجوومەنی وەزیرانی هەرێمی كوردستان، پێشوازییان لێكرا.

لێدوانی فەرمی: د. سەنعان عەبدوڵڵا، وتەبێژی دەستەى پاراستن و چاککردنی ژینگەى هەرێمی كوردستان تایبەت بە ئاڤا ڕایگەیاند، لە کۆبوونەوەکەدا باس لە کۆمەڵێک بابەتى تایبەت بە پاککردنەوەى پارێزگه‌کانى عێراق و هەرێمى کوردستان لە تیشكە زیانبەخشەكان کرا.

- باس لە دانانى پلان و ڕووپێوییەکی گونجاو کرا، بۆ چارەنووس و پاککردنەوەى هەرێمى کوردستان لە ماددەى تیشکاوەرى ئەگەر هەبێت، بۆ دڵنیابوونەوە لە شوێنى ئەو ماددانەى کەوا كۆگه‌ كراون و دوورن لە هەر پیسبوونێک بە ماددەى تیشکاوەرى.

- هاوكات بەهەماهەنگیی لایەنە پەیوەندیدارەكان، باس لە ڕێگریكردن لە داخڵبوونی ئەو ماددانە لە دەروازە سنوورییەكان كرا كە مەترسی هەبوونی تیشكی زیانبەخشییان لێ دەكرێت.

وتەبێژی دەستەى پاراستن و چاککردنی ژینگەى هەرێمی كوردستان ئاماژەی بەوەكرد، نوێنەری هەریەك لە وەزارەتەكانی ناوخۆ، پێشمەرگە، تەندروستی، پیشەسازی و بازرگانی، سامانە سرووشتییەكان، دەستەی وەبەرهێنان و بەڕێوەبەرایەتیی گشتیی گومرگەكان لەو كۆبوونەوەیە بەشداربوون، بەوپێیەی لایەنی پەیوەندیدارن بە پرسی ژینگە و پاكڕاگرتنی كەشوهەوا.

بابەتە ستراتیژییەكە: بڕیار درا کارى هەماهەنگى و پێکەوەیی لەنێوان تیمى هەردوو حكومەتی هەرێمی كوردستان و فیدراڵدا ئەنجام بدرێت؛ بۆ ئەوەى بە تەندروستترین شێوە ئەو بابەتانەى پەیوەستن بە ماددەى تیشکاوەرى، لە چوارچێوەى ڕێککەوتننامە نێودەوڵەتییەکان و پاڵپشت بە یاسا و ڕێنماییەکان، مامەڵەیان لەگەڵدا بکرێت، بە تایبەت لە بوارەكانی:

یەكەم: پشكنین بۆ كارگەكانی كەرەستە جۆراوجۆرەكان بكرێت، بە تایبەت ئەو ماددە خامانەی لە شارەكانی دیكەی عێراقەوە هێنراونەتە هەرێمی كوردستان بۆ دڵنیابوونەوە لەوەی ئاخۆ بە ماددەی تیشكاوەر پیسبوون یاخود نا.

دووەم: گومرگەكان ڕابسپێردرێن بە ڕێگریكردن لە داخیڵبوونی ئەو ماددانەی مەترسی تیشكی زیانبەخشییان لێ دەكرێت، لە دەروازە سنوورییەكاندا.