هێرشێكی ئیسرائیل بۆ سەر حەلەب دەیان کوژراو و برینداری لێکەوتووەتەوە

ئاڤا نیوز

 

ڕوانگەی سووری بۆ مافەکانی مرۆڤ ڕایگەیاند، بەپێی زانیارییە سەرەتاییەکان، بۆردوومانی بەرەبەیانی ئەمڕۆی ئیسرائیل بۆ سەر حەلەب، زیاتر لە 36 کوژراو و دەیان برینداری لێکەوتووەتەوە.

 

چیرۆکی سەرەکی: بەرەبەیانی ڕۆژی هەینی 29-03-2024 ئیسرائیل بە مووشەک کۆگایەکی هەڵگرتنی چەک و تەقەمەنی گرووپە چەکدارەکانی حیزبوڵڵای لوبنانی لە ناوچەی جبرینی شاری حەلەب لە سووریا کردە ئامانج، هەرچەندە سیستمی بەرگریی  ئاسمانیی ڕژێمی سووریا مووشەکی بۆ بەرپەرچدانەوەی مووشەکەکانی ئیسرائیل هەڵداوە، بەڵام مووشەکەکانی ئیسرائیل ئامانجەکەیان پێکاوە.

 

زەرەر و زیانەکان: ڕوانگەی سووری بۆ مافەکانی مرۆڤ ڕایگەیاند "بەپێی زانیارییە سەرەتاییەکان، زیاتر لە 36 ئەندامی هێزەکانی ڕژێمی سووریا لە ئەنجامی هێرشەکەی ئیسرائیل کوژراون و دەیان کەسی دیکەش بریندارن"، کە بە دیاریکراوی ئاماژەی بە ژمارەی بریندارەکان نەکردووە. 

 

لەلایەکی دیکەوە: ئەو شوێنەی کە ئیسرائیل هێرشی کردووەتە سەر لە نزیک فڕۆکەخانەی نێودەوڵەتیی حەلەبە، ڕوانگەی سووری سەبارەت بە زیانگەیشتن بە فڕۆکەخانەکە لە ئەنجامی هێرشەکە ئاماژەی بەوە داوە کە هیچ زیانێکی پێنەگەیشتووە.