سەرۆکوەزیران مەسرور بارزانی بەدواداچوون بۆ ئاگرەکەی هەڵەبجە دەکات

ئاڤا نیوز

وەزارەتی ناوخۆ ئامادەیی دامەزراوەکانی حکومەت بۆ بەدەنگەوەچوونی هەڵەبجە و کۆنترۆڵکردنی ئاگرەکەی ئەو پارێزگایە پیشان دەدات.

چیرۆکی سەرەکی: لە دوای نیوەڕۆی دوێنێ یەکشەممەوە ئاگرێکی بەرفراوان لە ناوچە شاخاوییەکانی کۆکۆیی هەڵەبجە کەوتووەتەوە و دوو کەس گیانیان لەدەستداوە و ڕووبەرێکی بەرفراوانی پووش و پاوانی ناوچەکەش سووتاون.

ڕاگەیێنراوی فەرمی: بەڕێوەبەرایەتیی گشتیی بەرگریی شارستانیی هەرێمی کوردستان ڕایدەگەیێنێت لە سەر فەرمانی سەرۆکوەزیران مەسرور بارزانی، بە مەبەستی بەدواداچوونی لێکەوتەکانی ئاگرکەوتنەوەکە ڕێبەر ئەحمەد، وەزیری ناوخۆی هەرێمی کوردستان پەیوەندیی بە پارێزگار و بەرێوەبەری بەرگریی شارستانیی هەڵەبجەوە کردووە و هاوخەمیی سەرۆکوەزیرانی پێ ڕاگەیاندوون.

زانیاریی زیاتر: وەزیری ناوخۆ ئامادەیی هەموو دامەزراوەکانی حکومەت و وەزارەتی ناوخۆی بۆ بەدەنگەوەچوونی هەڵەبجە پیشانداوە و تیمەکانی وەزارەتی ناوخۆی ڕاسپاردووە، کە کاری پێویست بۆ کوژاندنەوە و کەمکردنەوەی زیانەکان و کۆنترۆڵکردنی ئاگرەکە بکەن.

ئەوەی پێویستە بیزانیت: بە هۆی ئاگرەکەوە تا ئێستا کارمەندێکی پۆلیسی دارستان و ژینگە و خۆبەخشێک گیانیان لەدەست داوە و ڕووبەرێکی زۆری دارستانی ناوچەکەش سووتاون.