چوار ئامێری پێوانەکردنی کەشوهەوا لە هەولێر جێگیر دەکرێت

ئاڤا نیوز

دەستەی پاراستن و چاککردنی ژینگەی هەرێمی کوردستان، بەمەبەستی دیاریکردنی ڕێژەی پیسی کەشوهەوای شارەکان ئامێری پەیوەست جێگیر دەکات، قۆناغی یەکەم لە هەولێر جێبەجێ دەکرێت.

وێنە گەورەکە: لەماوە کابینەی نۆیەمی حکومەتی هەرێمی کوردستان، ستراتیژیەتی ڕێگریکردن لە گۆڕانکارییەکانی کەشوهەوا بەڕژدی کاری لەسەرکراوە، دەیان پاڵاوگە داخراون، سەدان مۆلیدە لەچوارچێوەی پڕۆژەی ڕووناکی کوژێنراونەتەوە و پڕۆژەی پشتێنەی سەوزایی جێبەجێ دەکرێت و هەزاران دار دەچێنرێن.

لێدوانی فەرمی: هەڤاڵ ئەحمەد، بەڕێوبەری فەرمانگەی گۆڕانی کەشوهەوا بە ئاڤای گوت، "ڕەزامەندی لەسەر دانانی چوار ئامێری پێوانەکردنی کەشوهەوا لە هەولێر وەرگیراوە و ماوەتەوە سەر ئەوەی پارەکەی خەرج بکرێت و ئامێرەکان جێگیر بکرێن. لە قۆناغی دووەم، چوار ئامێر لە سلێمانی دادەنرێت، لە دهۆک دوو ئامێری لێیە و نۆژەندەکرێنەوە."

خاڵە ئەرێنییەکان: دانانی ئامێری پێوانەکردنی کەشوهەوا، بۆ دیاریکردنی ڕادەی کاریگەری گازە ژەهراوییەکانە لە هەوای هەرێمی کوردستان، جگە لەوەی ڕادەی پیسی و خاوێنی بەشێوەیەکی بەردەوام پیشان دەدات، بەراوردی پێش هەنگاونان بۆ خاوێنکردنەوەی هەوا و دوای ئەوە دەخاتەڕوو.