قەتەر: بۆ ئاگربەست چاوەڕێی وەڵامی ئیسرائیل دەکەین

ئاڤا نیوز

بزووتنەوەی حەماس سەبارەت بە ڕاگەیاندنی ئاگربەست بۆ ماوەی 60 ڕۆژ لە کەرتی غەززە ڕەزامەندیی لەسەر پێشنیازەکەی قەتەر و میسر داوە، بەڵام تاوەکو ئێستا ئیسرائیل هیچ وەڵامێکی نەبووە.

لێدوانی فەرمی: مەجید ئەنساری، وتەبێژی وەزارەتی دەرەوەی قەتەر لە کۆنگرەیەکی ڕۆژنامەوانیدا ڕایگەیاند، "قەتەر و میسر وەڵامی حەماسیان بۆ پێشنیازی ئاگربەست لە غەززە وەرگرت و ئێمە هێشتا چاوەڕێی وەڵامی ئیسرائیلین بۆ قبووڵکردنی پێشنیازەکە، بەڵام تاوەکو ئێستا ئیسرائیل هیچ وەڵامێکیان نەبووە".

ئەنساری ئاماژەی بەوەشکرد، ئەو پێشنیازەی حەماس پێی ڕازی بووە، زۆر نزیک و هاوشێوەیە لەگەڵ ئەوەی پێشتر ئیسرائیل ڕەزامەندی لەسەر داوە.

لەلایەکی دیکەوە: دوو بەرپرسی ئیسرائیلی ئاشكرایان کرد، ئیسرائیل خوێندنەوە بۆ بۆ وەڵامی حەماس دەکات.

ئەوەی پێویستە بیزانیت: پێشنیازەکانی قەتەر و میسر بەم شێوەیەن:

- لە ڕۆژەکانی سەرەتای ئاگربەستەکە حەماس هەشت بارمتەی زیندوو ئازاد دەکات.

- لە 50ـهەمین ڕۆژی ئاگربەستدا دوو بارمتەی دیکەی ئیسرائیل ئازاد دەکرێن، هەروەها تەرمی ئەو سەربازە ئیسرائیلییانەی کە کوژراون و لای حەماسن ڕادەستی ئیسرائیل دەکرێنەوە.

- پێویستە هێزەکانی ئیسرائیل بە دووری هەزار مەتر لە سنووری کەرتی غەززە و هەزار و 200 مەتریش لەو ناوچانەی شوێنی نیشتەجێبوونن بکشێنەوە. بەڵام ئیسرائیل پێداگری لەسەر مانەوەی لە بەیت حانوون و شوجاعیە دەکات.

- ئازادکردنی هەزار و 500 زیندانی کە لە دوای 7ـی ئۆکتۆبەری 2023 لەلایەن ئیسرائیلەوە دەستگیرکراون.