عێراق مەرجەکانی بۆ ناردنی مووچەی فەرمانبەرانی کوردستان ئاشکرا دەکات

ئاڤا نیوز

وتەبێژی حکومەتی عێراق ڕایگەیاند، بە مەرجی تەواوکردنی کاری لیژنە هاوبەشەکان، ناردنی نەوت و پشکی حکومەتی فیدراڵ لە داهاتی نانەوتی لە ماوەی هەفتەیەکدا، حکومەتی عێراق مووچەی مانگی شەشی فەرمانبەرانی هەرێمی کوردستان ڕەوانە دەکات.

وێنە گەورەکە: لەم ڕۆژانەدا مووچەی مانگی هەشتی سەرجەم فەرمانبەران لە عێراق دابەش دەکرێت، بەڵام تاوەکو ئێستا مووچەی مانگەکانی شەش و حەوتی فەرمانبەرانی هەرێمی کوردستان لەلایەن عێراقەوە خەرج نەکراوە. کۆبوونەوەکانی نێوان هەولێر و بەغداش بۆ چارەسەرکردنی ئەم بابەتە بەشێوەی ڕۆژانە بەردەوامن و هەردوولا دەڵێن لێکتێگەیشتنێکی کاتی تا کۆتایی ئەمساڵ کراوە و کێشەکە بۆ ئەم چەند مانگەی ماوە، چارەسەر بووە.

لێدوانی فەرمی: باسم عەوادی، وتەبێژی حکومەتی عێراق لە کۆنفرانسێکی ڕۆژنامەنوسیدا ڕایگەیاند، "لەسەر بنەمای ڕاسپاردەی لیژنەی وەزاری پێکهێنراو بەبڕیاری سەرۆکوەزیران، ئەنجوومەنی وەزیران لە کۆبوونەوەی ئەمڕۆیدا بڕیاری دا مووچەی فەرمانبەرانی هەرێمی کوردستان بۆ مانگی شەش بنێرێت، ئەویش بە ڕەچاوکردنی سێ خاڵ".

باسم عەوادی وتیشی، مەرجەکانی حکومەتی عێراق بۆ ناردنی مووچەی مانگی شەشی فەرمانبەرانی کوردستان بریتین لە:

یەکەم: لیژنە هاوبەشەکان لە ماوەی هەفتەیەکدا ڕاپۆرتی خۆیان بۆ ئەنجوومەنی وەزیران بەرزبکەنەوە.

دووەم: لیژنەی هاوبەش لەماوەی هەفتەیەکدا پشکی حکومەتی فیدراڵ لە داهاتی نانەوتی هەرێمی کوردستان دیاری بکات و کوردستانیش ڕەوانەی بکات، لەم بوارەشدا پێوەرەکانی وەزارەتی دارایی فیدراڵ بە بنەما وەردەگیرێن.

سێیەم: حکومەتی هەرێمی کوردستان، کۆمپانیاکانی بواری نەوت پابەند بکات بەوەی نەوتی بەرهەمهێنراو بەگوێرەی یاسای بودجە و بڕیاری ژمارە 550ی ئەنجوومەنی وەزیران ڕەوانە بکەن.