زانیاریییەکان لەبارەی داهاتی نانەوتی گەیشتنە  دەست شاندی کوردستان لە بەغدا

ئاڤا نیوز

ماوەی دوو ڕۆژە شاندێکی باڵای هەرێمی کوردستان لە بە‌غدان، ئەمڕۆش بەردەوامی بە کۆبوونەوەکانیان دەدەن و داهاتی نانەوتی پرسی گەرمی سەرمێزی گفتوگۆ دەبێت. کۆمەڵێک زانیاری پێویست لەبارەی داهاتی نانەوتی هەبوون، شەوی ڕابردوو گەیێنراونەتە دەست شاندەکە.

چیرۆکی سەرەکی: لە کۆبوونەوەی ڕۆژی سێشەممەی ئەنجوومەنی وەزیرانی عێراق بڕیار لە خەرجکردنی مووچەی مانگی شەشی مووچەخۆران درا، بە مەرجی ڕادەستکردنی 120 ملیار داهاتی نانەوتی و چارەسەرکردنی گرفتە تەکنیکییەکانی هەناردەی نەوت و ناردنی لیستی پۆلینی سەرچاوەکانی داهاتی نانەوتی هەرێمی کوردستان بە بەغدا.

لێدوانی تایبەت: سەرچاوەیەک لە وەزارەتی دارایی و ئابووریی هەرێمی کوردستان بە ئاڤای گوت، ئەمڕۆش کۆبوونەوەی شاندی هەرێمی کوردستان لە بەغدا بەردەوامییان دەبێت، بۆ ئەوەی بگەنە ڕێککەوتن لەسەر ئەو پرسانەی کە بەربەستن لەبەردەم ناردنی مووچە، میکانیزمی ڕادەستکردنی داهاتی نانەوتی مانگەکانی حەوت و مانگەکانی تر پرسی گەرمی گفتوگۆی نێوانیان دەبێت.

شەوی ڕابردوو ئەو زانیارییانەی پێویست بوون بۆ شاندەکە لەبارەی داهاتی نانەوتی هەرێمی کوردستان، گەیشتوونەتە دەست شاندی هەرێمی کوردستان و لەگفتوگۆکانیان لەگەڵ شاندی بەغدا هەڵوەستەی لەسەر دەکرێت.