وەزارەتی دارایی بۆ ئاڤا: ناوەڕاستی هەفتەی داهاتوو پارەی مووچە دەگات

ئاڤا نیوز

هەوڵەکانی نێوان شاندی هەرێمی کوردستان و حکومەتی فیدراڵی عێراق بۆ ناردنی مووچەی مانگی شەشی فەرمانبەرانی کوردستان بەردەوامن و چاوەڕوان دەکرێت لە ناوەڕاستی هەفتەی داهاتوودا مووچە خەرج بکرێت.

وێنە گەورەکە: هەوڵەکان بۆ ڕێککەوتنی نێوان هەولێر و بەغدا لەبارەی ناردنی مووچە، داهاتی ناوخۆ و هەناردەکردنەوەی نەوتی کوردستان بەردەوامن، شاندی هەولێر لە بەغدا لەگەڵ لایەنە پەیوەندیدارەکان بەردەوامە لە گفتوگۆ.

زانیاریی بەدەستهاتوو: بەپێی زانیارییەکان، جێبەجێکردنی ئەو دوو مەرجەی کە ئەنجوومەنی وەزیرانی عێراق دایناوە، کلیلی ناردنی مووچەیە. مەرجی یەکەم ناردنی 120 ملیار دینارە لە داهاتی نانەوتیی هەرێمی کوردستان، کە لەمبارەیەوە پێشەوا هەورامانی، گوتەبێژی حکومەتی هەرێمی کوردستان ڕایگەیاندووە: "120 ملیار دینار داهاتی نانەوتیی مانگی شەش ئامادەیە و هەر کاتێک پێویست بکات، دەخرێتە سەر هەژماری بانکیی وەزارەتی دارایی عێراق."

مەرجی دووەمیش بریتییە لە پۆلێنکردنی سەرچاوەکانی داهاتی نانەوتیی هەرێمی کوردستان. بۆ تاووتوێکردنی ئەم مەرجە، ئەمڕۆ شاندێکی باڵای هەرێمی کوردستان بۆ ماوەی چەند کاتژمێرێک لەگەڵ تەیف سامی، وەزیری دارایی عێراق کۆبووەوە و بڕیارە لە ڕۆژانی داهاتووشدا گفتوگۆکان بەردەوام بن تا ڕاپۆرتێکی کۆتایی پێشکەشی ئەنجوومەنی وەزیرانی عێراق بکرێت.

لێدوانی فەرمی: سەرچاوەیەکی باڵا لە ئەنجوومەنی وەزیرانی عێراق بە ئاڤای وت، "هێشتا نووسراوی فەرمیی بڕیارەکەی ئەنجوومەنی وەزیران ئاراستەی وەزارەتی دارایی نەکراوە بۆ خەرجکردنی مووچە، بەڵام چاوەڕوان دەکرێت لە زووترین کاتدا نووسراوەکە بکرێت".

لەلایەکی دیکەوە: سەرچاوەیەک لە وەزارەتی دارایی هەرێمی کوردستان بۆ ئاڤا پشتڕاستی کردەوە کە مووچەی مانگی شەش لە ناوەڕاستی هەفتەی داهاتوودا دەگات. هەروەها ئاماژەی بەوەدا کە لیستی دابەشکردنی مووچە ئامادەیە و هاوشێوەی مانگی پێشوو دەبێت و لە ماوەی سێ بۆ پێنج ڕۆژدا دابەش دەکرێت، کە بە خانەنشینان و کەسوکاری شەهیدان و ئەنفالکراوان دەست پێدەکات.

زانیاریی زیاتر: لقی هەولێری بانکی ناوەندیی عێراق ئامادەیی خۆی دەربڕیوە و ڕایگەیاندووە کە پارەی پێویستیان لەبەردەستە و هەر کاتێک ئاگادار بکرێنەوە، ڕاستەوخۆ پارە دەخەنە سەر هەژماری وەزارەتی دارایی هەرێمی کوردستان.