چەند چەكدار و فەرماندەیەكی داعش لە سووریا هەڵدێن

ئاڤا نیوز

هەرچەندە ڕێکخراوی داعش پێگەکە سەرەکییەکانی لە ڕۆژهەڵاتی ناوەڕاست بەتایبەت عێراق و سووریا لەدەستداوە، بەڵام هێشتا شانە نووستووەکانی چالاکن، لە نوێترین پێشهاتدا 12 فەرماندە و چەکداری داعش لە زیندانێکی عەفرین هەڵاتوون.

ڕاگەیێنراوی فەرمی: ڕوانگەی سووریا بۆ مافەکانی مرۆڤ بڵاویکردەوە: 12 زیندانی داعش لە زیندانێکی عەفرین هەڵاتوون، دوای ئەوەی لەگەڵ بەرپرسانی سەربازی زیندانەکە لەبەرامبەر پێدانی پارە ڕێککەوتوون.

زانیاریی زیاتر: وەک ڕوانگەی سووریا ئاشکرایکردووە ئەو ئەندام و فەرماندانەی داعش لەگەڵ بەرپرسانی زیندانەکە بە نهێنی ڕێککەوتوون کە پۆلیسی سەربازی گروپەکانی ئۆپۆزسیۆنی سووریا كە نزیک لە تورکیا چاودێریی زیندانەکە دەکەن، بەهۆی ڕووداوەکەشەوە پۆلیسی سەربازی دوو بەرپرسی زیندانەکەی دەستگیرکردووە.

ئەوەی پێویستە بیزانیت: ڕوانگەی سووریا بۆ مافەکانی مرۆڤ ڕایگەیاندووە هەریەکێک لەچەکداران و ئەندامانی داعش لەبەرامبەر ڕێگەدان بە هەڵاتنیان دەبێت هەزار بۆ سێ هەزار دۆلار بدەنە بەرپرسانی زیندانەکە.

باکگراوند: ئەو زیندانەی زیندانییەکانی داعش لێی هەڵاتوون، لەناوچەی بلبلی عەفرینە و دەکەوێتە سەر سنووری باکوور و ڕۆژئاوای کوردستان.