ڕێباز حەملان: بڕیارە ئەم هەفتەیە مووچەی مانگی شەش خەرج بکرێت

ئاڤا نیوز

ڕێباز حەملان، یاریدەدەری سەرۆکوەزیران مەسرور بارزانی دەڵێت، هەولێر و بەغدا لەسەر پرسی نەوت و داهاتی گومرگی ڕێککەوتوون، بڕیارە لەم هەفتەیە مووچەی مانگی شەش خەرج بکرێت.

چیرۆکی سەرەکی: شاندێکی هەرێمی کوردستان  لە بەغدان، لەگەڵ لیژنەکانی وەزارەت لە ئەنجوومەنی وەزیرانی عێراق کۆبوونەوە. مووچە، داهاتی نانەوتی و  پرسی هەناردەکردنەوەی نەوت پرسی گەرمی گفتوگۆکانیانە.

لێدوانی فەرمی:  ڕێباز حەملان، یاریدەدەری سەرۆکوەزیران مەسرور بارزانی بە ئاڤای گوت، "لە گفتوگۆی نێوان شاندەکان پرسی نەوت و داهاتی گومرگی یەکلایی کراوەتەوە و گفتوگۆ لەسەر باج و ڕسوماتی وەزارەتەکان دەکرێت."

ئەمەش بزانە: هەفتەی ڕابردوو ئەنجوومەنی وەزیرانی عێراق، ڕەزامەندی لەسەر خەرج کردنی مووچەی مانگی شەشی مووچەخۆرانی هەرێمی کوردستان دا، خەرجکردنی پارەکەش پەیوەستکراوە بە جێبەجێکردنی سێ مەرج، کە بە گوتەی ڕێباز حەملان، حکومەتی هەرێمی کوردستان لە چوارچێوەی یاسای کارگێڕی مەرجەکانی بەغدا جێبەجێ کراون و دەبێت لەم هەفتەیە مووچەی مانگی شەش خەرج بکرێت.