ئەنجوومەنی وەزیرانی عێراق ڕەزامەندی لەسەر ناردنی مووچەی مانگی شەش دا

ئاڤا نیوز

 

ئەنجوومەنی وەزیرانی عێراق ڕەزامەندی لەسەر خەرج کردنی مووچەی مانگی شەشی مووچەخۆرانی هەرێمی کوردستان دا بەو مەرجەی هەرێمی کوردستان 120 ملیار دینار بداتە بەغدا.

 

وێنە گەورەکە: ئەمڕۆ سێشەممە ئەنجوومەنی وەزیرانی عێراق بە سەرپەرشتی محەممەد شیاع سوودانی، سەرۆکوەزیرانی عێراق کۆبووەوە. لە پەراوێزی کۆبوونەوەکەدا باسی مووچەی فەرمانبەرانی کوردستان کرا و دواتر بە دەنگدان ئەنجوومەنی وەزیرانی عێراق ڕەزامەندی لەسەر خەرج کردنی مووچەی مانگی شەشی فەرمانبەرانی کوردستان دا، بەو مەرجەی هەرێمی کوردستان بڕی 120 ملیار دینار وەکو داهاتی بەشی گەنجینەی فیدراڵی بداتە بەغدا.

 

لە کۆبوونەوەکەدا سوودانی باسی بابەتی مووچەی خەڵکی کوردستانی کرد و هاوکات هەر لەو کۆبوونەوەیەدا باسی ئەو کۆنووسە کرا کە لەلایەن هەرێمی کوردستان و عێراقەوە ئامادە کراوە- کۆنووسەکە بەشێوەیەکە هەردوو حکومەتی هەرێمی کوردستان و عێراق کاری لەسەر دەکەن تاوەکوو لەسەر داهاتی ناوخۆ دەگەنە ڕێککەوتنی کۆتایی.

 

لەلایەکی دیکە: سەرچاوەیەک لە لقی هەولێری بانکی ناوەندیی عێراق بە ئاڤای گوت، "پارەی پێویست لەبەردەستە بۆ دابینکردنی مووچە".

 

ئەوەی پێویستە بیزانیت: هاوکات لەگەڵ ڕەزامەندی ئەنجوومەنی وەزیرانی عێراق بۆ ناردنی مووچەی مانگی شەش، وەزارەتی دارایی کوردستان بە ئاڤای ڕاگەیاند، کە ئامادەن بۆ ناردنی 120 ملیاری داهاتی ناوخۆ بۆ بەغدا. 

 

ئەمەش بزانە: پارەی مووچەی مانگی شەشی مووچەخۆرانی کوردستان زیاتر لە 950 ملیار دینارە.