عێراق: دەستبەجێ نەوتی بەرهەمهاتوو لە کێڵگەکانی کوردستان بدرێتە سۆمۆ

ئاڤا نیوز

 

ئەنجوومەنی وەزیرانی عێراق لە کۆبوونەوەی ئاسایی خۆیدا بە سەرۆکایەتیی محەممەد شیاع سوودانی، ڕەزامەندیی نیشان دا لەسەر خەرج کردنی مووچەی مانگی حوزەیرانی فەرمانبەرانی هەرێمی کوردستان و داوای کرد دەستبەجێ نەوتی بەرهەمهاتوو لە کێڵگەکانی کوردستان ڕادەستی سۆمۆ بکرێت.

 

ڕاگەیێنراوی فەرمی: بەپێی ڕاگەیێنراوی نووسینگەی سەرۆکوەزیرانی عێراق، بڕیاری خەرج کردنی مووچەکە بە مەرجی ئەوەیە کە حکومەتی هەرێمی کوردستان بڕی 120 ملیار دینار لە داهاتە نانەوتییەکانی ڕادەستی حکومەتی فیدراڵی بکات.

 

ئەوەی پێویستە بیزانیت: لە بەشێکی دیکەی کۆبوونەوەکەدا کە تایبەت بوو بە دۆسیەی نەوت، ئەنجوومەنی وەزیران جەختی لەسەر ئەنجامی گفتوگۆی لیژنە هاوبەشەکانی نێوان وەزارەتی نەوتی فیدراڵی و وەزارەتی سامانە سروشتییەکانی هەرێمی کوردستان کردەوە و داوای کرد دەستبەجێ نەوتی بەرهەمهاتوو لە کێڵگەکانی کوردستان بدرێتە کۆمپانیای بەبازاڕکردنی نەوتی عێراق (سۆمۆ)، بە مەبەستی هەناردەکردنی لە ڕێگەی بەندەری جەیهان و بەپێی یاسای بودجەی فیدراڵی.

 

لەلایەکی دیکە: بۆ چارەسەرکردنی کێشە یاساییەکانیش، بڕیاردراوە تیمێکی یاسایی هاوبەش لەنێوان هەردوو حکومەت پێکبهێنرێت بۆ یەکلایی کردنەوەی ناکۆکییەکان لەسەر داهاتە نانەوتییەکان.