لە هەولێر کاروباری نەخۆشخانەکان بە ئەلیکترۆنی دەکرێن

ئاڤا نیوز

بڕیارە سەرجەم نەخۆشخانەکانی سنووری پارێزگای هەولێر کاروبارەکانی بکرێنە ئەلیکترۆنی، پرۆسەکە ئێستا دەستیپێکردووە و بەشێکی نەخۆشخانەکان کارەکانیان تەواو بووە.

وێنە گەورەکە: لە چوارچێوەی سیستمی بە ئەلیکترۆنیکردنی کاروبارەکان لە دامودەزگاکانی حکومەتی هەرێمی کوردستان، پرۆسەی بە ئەلیکترۆنی کردنی کاروبارەکان لە نەخۆشخانەکان دەستپێکردووە، لە کۆی 16 نەخۆشخانە، دوو نەخۆشخانە کاروبارەکانیان کراون بە ئەلیتکرۆنی.

لێدوانی فەرمی: سەعد کەمال، بەڕێوەبەری کارگێریی نەخۆشخانەی ڕزگاری بە ئاڤا میدیای ڕاگەیاند، ماوەیەکی زۆرە وەزارەتی تەندروستی سەقاڵی بە ئەلیکترۆنیکردنی سیستمی نەخۆشخانەکانە، ئێستا بەشێک لە کارەکانی نەخۆشخانەی ڕزگاری تەواو کراوە و بڕیارە لە داهاتوویەکی نزیکدا سەرجەم کارەکان بکرێنە ئەلیکترۆنی. هاوکات، ئێستا نەخۆشانەی پیرمام و تەلاسیما و بانکی خوێن سیستمی کاروبارەکانیان بە ئەلیکترۆنی کراوە.

- هەندێک کاروبار لە نەخۆشاخانەی لەدایکبوون و ڕزگاری کراون بە ئەلیکترۆنی، چاوەڕوان دەکرێت لە داهاتوویەکی نزیک تەواوی سیستمی نەخۆشخانەکان بکرێتە ئەلیکترۆنی.

بۆچی گرنگە: دوای ئەوەی سیستمی نەخۆشخانەکان کران بە ئەلیکترۆنی، هاووڵاتیان چیتر نۆرەی بلیت و تیشک و تاقیگە ناگرێت، ئامێرێک دادەنرێت و بارکۆدی لەسەرە لەڕێگەی ئەلیکترۆنییەوە بلیت دەبڕێت و پارە دەدات، دوای پشکنین ئەو دەرمانانەی بۆ نەخۆش پێویستە دەنێردرێت بۆ دەرمانخانە و هاووڵاتیان دەتوانن وەری بگرن بەبێ ئەوەی بلیتی لەلا بێت.

ئەوەی پێویستە بیزانیت: لە کابینەی نۆیەمی حکومەتی هەرێمی کوردستان لەپێناو بەرژەوەندی گشتیی و نەهێشتنی ڕۆتینیات، بەشێکی زۆر لە کاروبارەکانی دامودەزگاکان بە ئەلیکترۆنی  کراون.