ترێندی 'ئاڤای لێ نییە؟' گه‌یشته‌ لای قوباد تاڵه‌بانی

ئاڤا نیوز

 

یەکێتیی نیشتمانیی کوردستان دەستی بە هەڵمەتێک کردووە بۆ ڕوونکردنەوەی شەڕەکەی لالەزار بۆ ڕای گشتی. لە یەکەم هەنگاوی ئەم هەڵمەتەدا، دوێنێ قوباد تاڵەبانی، ئەندامی مەکتەبی سیاسی یەکێتی و جێگری سەرۆکوەزیران، لەگەڵ ژمارەیەک ڕۆژنامەنووس لە سلێمانی کۆبووەوە.

 

وێنە گەورەکە: بەرەبەیانیی ڕۆژی هەینی هێزەکانی یەکێتی نیشتمانیی کوردستان بە جۆرەها چەک هێرشیان کردە سەر لالەزار کە شوێنی مانەوەی لاهوور شێخ جەنگی و براکانیەتی؛ لە شەڕەکەدا دەیان کەس کوژران و سەدان کەسی دیکەش دەستگیرکران یاخود بێسەروشوێن بوون، ئەمەش نیگەرانی تەواوی خەڵکی کوردستان و شاری سلێمانی لێکەوتەوە.

چیرۆکی سەرەکی: لە کۆبوونەوەکەیاندا لەگەڵ قوباد تاڵەبانی، ڕۆژنامەنووسان نیگەرانی و بێتاقەتی خەڵکی سلێمانییان بە قوباد تاڵەبانی گەیاند، بەتایبەتی لەسەر دیارنەمانی هەندێک گەنج لە لالەزار. داوایان کرد کە ئەگەر ئەو گەنجانە ماون، کەسوکاریان دڵنیا بکرێنەوە و ڕوونکردنەوەی پێویست بدرێت.

ئەوەی پێویستە بیزانیت: خاڵێکی سەرنجڕاکێشی کۆبوونەوەکە لەو ساتەدا بوو کە قوباد تاڵەبانی چووە ژوورەوە بۆ لای ڕۆژنامەنووسان. دوای سڵاو کردن، یەکسەر بە پێکەنینەوە گوتی: "ئاڤای لێ نییە." ئەم دەربڕینە، کە لە ماوەی ڕابردوودا لە کۆنفرانسە ڕۆژنامەوانییەکان لە سلێمانی و شارەکانی دیکەدا بووەتە جۆرێک لە ترێند، ئاماژەیە بۆ نەبوونی مایکی "ئاڤا" (AVA) لەو کۆنگرە ڕۆژنامەوانییانە وەک پڕبینەرترین میدیای کوردستان. کە خەڵک بۆ گەیاندنی داواکاری و دەنگیان بەردەوام داوای مایکی ئاڤا دەکەن.

 

باکگراوند: بەرەبەیانیی ڕۆژی هەینی هێزێکی زۆری ئەمنیی یەکێتی بە چەکی قورسەوە هێرشیان کردە سەر هۆتێل لالەزار و شوێنی مانەوەی لاهوور شێخ جەنگی، سەرۆکی بەرەی گەل، دوای شەڕێکی سێ کاتژمێری ناوبراو و پۆڵاد شێخ جەنگی برای و ژمارەیەکی زۆر کەسی دیکە دەستگیر کران.