پلەکانی گەرما لە ڕۆژ‌هەڵاتی کوردستان ڕیکۆردی 50 ساڵی ڕابردوو دەشکێنێت

ئاڤا نیوز

بەپێی ڕاپۆرتی ڕێکخراوی کەشناسیی ئێران، پلەی گەرما لە چەندین شاری ڕۆژهەڵاتی کوردستان ڕیکۆردی 50 ساڵی ڕابردووی شکاندووە. ئەم شەپۆلە گەرمایە چاوەڕوان دەکرێت بۆ ماوەی چەند ڕۆژی دیکەش بەردەوام بێت.

 

لێدوانی فەرمی: محەممەد ئەسغەری، شارەزای ڕێکخراوی کەشناسیی ئێران، ڕایگەیاند کە ڕۆژی سێشەممە پلەی گەرما لە شارەکانی سنە، ئیلام، کرماشان و خوڕماوا لە ڕۆژهەڵاتی کوردستان بەرزترین پلەی نیوسەدەی ڕابردووی تۆمار کردووە.

ئەوەی پێوویستە بیزانیت: لە ناوچە گەرمەسێرەکانی ئیلام، پلەی گەرما نزیکەی 50 پلەی سەدی بووە. هەروەها، خەبات قەمەری، شارەزای ڕێکخراوی کەشناسیی پارێزگای سنە، ئاماژەی بەوەدا کە پلەی گەرما لە شاری سنە گەیشتووەتە 42 پلە، کە لەم کاتەدا بێوێنە بووە.

لەلایەکی دیکە: محەممەد عەلی زورئاوەند، بەڕێوەبەری کەشناسیی پارێزگای ئیلام، ڕایگەیاند کە ڕۆژی سێشەممە پلەی گەرما لە شاری کرماشان 42 پلە و لە شاری قەسرشیرینیش 45 پلە بووە.

بەپێی پێشبینییەکانی محەممەد عەلی زورئاوەند، چاوەڕوان دەکرێت پلەی گەرما تاوەکو ڕۆژی یەکشەممەی هەفتەی داهاتوو ڕوو لە دابەزین بکات و تا ڕادەیەک کەشوهەوا فێنک ببێتەوە.