کێشەی مووچەی پاککەرەوەی نەخۆشخانەکانی ڕاپەڕین چارەسەر دەکرێت

ئاڤا نیوز

 

265 کارمەندی خزمەتگوزاریی پاککەرەوەی نەخۆشخانەکانی سنووری ئیدارەی ڕاپەڕین، کە ماوەی پێنج مانگ بوو مووچەیان وەرنەگرتبوو و بایکۆتی کارەکانیان کردبوو، گەڕانەوە سەر کارەکانیان. بەڕێوەبەرایەتی گشتیی تەندروستیی ڕاپەڕینیش مژدەی چارەسەرکردنی کێشەکەیانی ڕاگەیاند و گوتی، بڕیارە هەفتەی داهاتوو مووچەکانیان خەرج بکرێت.

چیرۆکی سەرەکی: ئەو کارمەندانە، کە مووچەی مانگانەیان تەنها 350 هەزار دینارە و هەفتەی شەش ڕۆژ کار دەکەن، بەهۆی وەرنەگرتنی مووچەکانیانەوە تووشی دۆخێکی خراپی ئابووری بووبوون. ئەمەش وایکرد نزیکەی دوو هەفتە بایکۆتی کارەکانیان بکەن و بەهۆیەوە ناوەندە تەندروستییەکان پڕ ببوون لە پاشماوە و زبڵ.

زانیاریی پەیامنێر: هەنگاو محەممەد، پەیامنێری ئاڤا ڕاگەیاند، کارمەندەکان ئەمڕۆ گەڕاونەتەوە سەر کارەکانیان و وتوویانە: "ویژدانمان ڕێگەی نەدا نەخۆشخانەکان پڕبن لە پاشماوەی پزیشکی، چاوەڕێ دەکەین تا دەرگایەکمان لێ دەکرێتەوە."

ئەوەی پێویستە بیزانیت: دکتۆر سەفەر حەسەن، بەڕێوەبەری تەندروستیی گشتیی ڕاپەڕین، مژدەیەکی خۆشی بە کارمەندەکان دا و ڕایگەیاند: "لە سەدا 70ی کارەکانی دابینکردنی مووچەی ئەو کارمەندانە چارەسەر کراوە و بڕیارە هەفتەی داهاتوو کارمەندەکان چەند مووچەیەک بەیەکەوە وەربگرن".