ڕێکارەکانی پێدانی 120 ملیار دینار داهاتی ناوخۆ بە بەغدا دەستیپێکرد

ئاڤا نیوز

 

بڕیارە ئەمڕۆ 120 ملیار دینار داهاتی نانەوتی هەرێمی کوردستان بۆ وەزارەتی دارایی عێراق بنێردرێت بۆ ئەم مەبەستەش ڕێکارەکانی ناردنی پارەکە دەستیپێکردووە.

 

وێنە گەورەکە: بەپێی ڕێکەوتنی نێوان حکومەتی هەرێمی کوردستان و حکومەتی عێراق، دوای بڕیاری ئەنجوومەنی وەزیرانی عێراق بۆ ناردنی مووچەی مانگی شەشی مووچەخۆرانی هەرێمی کوردستان، وەک مەرجی ناردنی مووچە 120 ملیار دینار لە داهاتی نانەوتی هەرێمی کوردستان دەدرێتە وەزارەتی دارایی عێراق.

 

لێدوانی فەرمی: سەرچاوەیەک لە لقی هەولێری بانکی ناوەندیی عێراق بە ئاڤا میدیای گوت: ئەمڕۆ 120 ملیارەکە دەخرێتە سەر هەژماری وەزارەتی دارایی عێراق و ڕێکارەکانی ناردی ئەو بڕە پارەیە دەستیپێکردووە.

 

لەلایەکی دیکەوە: سەرچاوەیەک لە وەزارەتی دارایی بە ئاڤا میدیای گوت: گواستنەوەی پارەکە بە کاش لە بانکی منارەوە بۆ لقی هەولێری بانکی ناوەندی دەستیپێکردووە و لە یەک بۆ دوو کاتژمێر نووسراوی ڕادەستکردنی پارە بۆ وەزارەتە دارایی عێراق دەنێردرێت.

 

بۆچی گرنگە: بە ناردنی 120 ملیارەکە هیچ بەربەستێک بۆ ناردنی مووچەی مانگی شەشی مووچەخۆرانی هەرێمی کوردستان نامێنێت.