120 ملیار دینار داهاتی ناوخۆ خرایە سەر هەژماری بانکی وەزارەتی دارایی عێراق

ئاڤا نیوز

 

120 ملیار دینار داهاتی نانەوتی هەرێمی کوردستان بۆ مانگی حوزەیران خرایە سەر هەژماری بانکیی وەزارەتی دارایی عێراق.                                                                         
ڕاگەیێنراوی فەرمی: وەزارەتی دارایی و ئابووریی هەرێمی کوردستان بڵاوی کردەوە: ئەمڕۆ پێنجشەممە  28ی ئابی 2025، داهاتی نانەوتی هەرێمی کوردستان بۆ مانگی حوزەیرانی ساڵی 2025 کە بڕەکەی 120 ملیار دینارە، بەشێوەی کاش خرایە سەر هەژماری بانکیی وەزارەتی دارایی حکومەتی فیدراڵ لە لقی هەولێری بانکی ناوەندیی عێراق.                                                                                    

لێدوانی فەرمی: سەرچاوەیەک لە وەزارەتی دارایی و ئابووریی هەرێمی کوردستان ناردنی ئەو 120 ملیار دینارەی پشتڕاستکردەوە و گوتی، ناردنی ئەو بڕە پارەیە تەواو بووە و هەر کاتێکیش پارە بۆ مووجە بنێردرێت ڕاستەوخۆ لیستی مووچە ڕادەگەیەنرێت و دەست بە دابەش کردنی مووچە دەکرێت.

 

بۆچی گرنگە: ئێستا هیچ مەرج و بەربەستێک بۆ ناردنی مووچەی مانگی حوزەیرانی مووچەخۆرانی هەرێمی کوردستان نەماوە.

باکگراوند: لە دوایین کۆبوونەوەی ئەنجوومەنی وەزیرانی عێراق کە ڕۆژی سێشەممە 26/8/2025، بەڕێوەچوو، محەممەد شیاع سوودانی، سەرۆکوەزیرانی عێراق بڕیاری دا مووچەی مانگی شەشی فەرمانبەرانی هەرێمی کوردستان خەرج بکات، بەو مەرجەی هەرێمی کوردستان 120 ملیار دینار داهاتی ناوخۆ بداتە بەغدا.