مووچەی چوار مانگی کارگوزاری نەخۆشخانەکانی ڕاپەڕین خەرج دەکرێت

ئاڤا نیوز

لە سنووری ئیدارەی ڕاپەڕێن شایستەی دارایی چوار مانگی کارگوزاری نەخۆشخانەکان خەرج نەکراوە، پەرلەمانتارێکی پارتی لەوبارەیەوە دەڵێت: 'لە ئەنجوومەنی وەزیران ڕەزامەندی خەرجکردنی شەیستە داراییەکانیان دراوە'.

بابەتی سەرەکی: داوای ئەوەی کۆمپانیای سەرپەرشتیاری خاوێنکردنەوەی نەخۆشخانەکانی ڕاپەڕین لە مانگی سێی 2025 گرێبەستەکەی تەواو بووە، تاوەکو ئێستا هیچ کۆمپانیایەکی دیکە جێگەی نەگرتووەتەوە، بەوهۆیەوە مووچەی مانگەکانی چوار و پێنج و شەش و حەوتی کارگوزارەکان و شایستە دارایییەکانی نەخۆشخانەکانی سنووری ئیدارەی ڕاپەڕین خەرج نەکراوە. 

لێدوانی فەرمی: مەرد عەلی خاڵە، ئەندامی خولی شەشی پەرلەمانی کوردستان، بە ئاڤا میدیای ڕاگەیاند: کارم لەسەر ئەم دۆسیە کرد، دواتر  بەمەبەستی چارەسەرکردنی کێشەکە لە ڕێگەی وەزیری دارایی و ئابوورییەوە نووسراوێک بۆ چۆنییەتی خەرجکردنی مووچەی کارگوزارەکان ئاراستەی سەرۆکی دیوانی ئەنجوومەنی وەزیران کراوە.

ئەو پەرلەمانتارە دەڵێت: ئومێد سەباح، سەرۆکی دیوان بە نووسراوی فەرمی وەڵامی وەزارەتی دارایی و ئابووری دایەوە، ڕایگەیاند: ''مووچەی مانگەکانی چوار و پێنج و شەش و حەوتیان بۆ خەرج بکەن، تاوەکو کۆتایی ئەمساڵیش حکومەت پێدانی مووچەکانیان لە ئەستۆ دەگرێت، تا ئەو کاتەی سەرپەرشتی خاوێنکردنەوە و کارگوزارەکان بە تەندەر بە کۆمپانیایەکی دیکە دەدرێت".

ئاماژەی بەوەشکرد، ئەمڕۆ 28-8-2025، وەزارەتی دارایی و ئابووری نووسراوی فەرمی ئاراستەی بەڕێوەبەرایەتیی گەنجینەی ڕاپەڕین کردووە، هەروەها ڕەزامەندی لەسەر خەرجکردنی مووچەی کارگوزارەکان و شایستە داراییەکانی نەخۆشخانەکان داوە.